Hluê si amai Phan Thị Trinh, k’iăng khua bruă hđeh êdam êra čar Dak Lak, mta kñăm hlăm bruă hâo hưn mơ̆ng phung hđeh êdam êra hlăm thŭn leh êgao jing 2 klei bi lông hâo hưn kơ klei bhiăn ala čar ti să Krông Knô, kdriêk Lak leh anăn să Čư̆ Pui, kdriêk Krông Bông. Bruă hđeh êdam êra čar Dak Lak bi mguôp hŏng sang dlăng hră čar mkŏ mjing klei bi lông êlan online ksiêm hriăm kơ klei bhiăn ala čar kơ phung hđeh êdam êra.

Hluê anăn dưi iêo mthưr giăm 37 êbâo gưl čô hđeh êdam êra nao bi lông. Jih jang dŭm kdriêk, wăl krah, ƀuôn prŏng leh anăn Êpul bruă hđeh êdam êra mâo sơăi dŭm bruă hâo hưn, mtô bi hriăm klei bhiăn ala čar leh anăn dŭm mta bruă tŭ drông “Hruê klei bhiăn ala čar Yang ƀuôn ngă phŭn Việt Nam 9/11”. Amai Phan Thị Trinh brei thâo, Êpul bruă hđeh êdam êra mkŏ mjing leh bruă hâo hưn truh kơ grăp čô hđeh êdam êra hŏng dŭm hdră msĕ si, mbah internet yang ƀuôn, dưn kyua klei hưn mthâo mrâo mrang amâodah dŭm anôk mđung asăp blŭ, klei bi lông, klei phat kđi ngă mgưt, dŭm klei kbĭn, klei mtô bi hriăm kơ grăp êpul klă klơ̆ng.

Bruă hâo hưn hlăm dŭm wưng msĕ si: Mlan hđeh êdam êra, hdră bruă hđeh êdam êra yan mdei prŏng leh anăn boh nik jing mlan mâo hruê Klei bhiăn ala čar Việt Nam. Hmei ăt pluă mbĭt klei hâo hưn kơ klei bhiăn ala čar, dŭm hdră mtrŭn mơ̆ng Đảng, dŭm mmông kƀĭn bruă hđeh êdam êra. Mta phŭn anei hmei ăt kñăm uêñ mĭn truh kơ nah gŭ čiăng dưi hluê ngă.