Čar Yên Bái lŏ mâo lu hdră mtrŭn, hdră êlan ăt msĕ mơh hâo hưn, mtrŭt mnuih ƀuôn sang mđĭ klei thâo săng, bi mlih bruă ngă, hlue ngă jăk hdră êlan, hdră bhiăn mơ̆ng Đảng, knŭk kna, mơ̆ng anăn klei hdĭp mnuih djuê ƀiă ti krĭng taih kbưi mâo lu klei êdah kdlưn.

Giàng Pằng jing alŭ ƀun ƀin êdi, kbưi hŏng anôk bruă să Sùng Đô, kdriêk Văn Chấn hlăm brô 30 km. Dôk ti čư̆ čhiăng, amâo mâo pui kmlă, amâo mâo dăng kông đĭng blŭ, êlan êrô êbat dleh dlan, mnuih ƀuôn sang tinei ƀiă sơnăk mâo klei hâo hưn mơ̆ng nah êngao, boh nik jing dŭm klei hưn djŏ tuôm hŏng hdră êlan, klei bhiăn ala čar. Kyuanăn yơh, knuă druh să jêñ jêñ nao truh ti alŭ, nao truh kơ grăp boh sang čiăng hâo hưn, mtô mblang kơ dŭm hdră êlan mơ̆ng Đảng, klei bhiăn ala čar, mbĭt anăn ksiêm dlăng kơ dŭm klei čiăng hlăm boh sĭt mơ̆ng mnuih ƀuôn sang, hmao hâo hưn, ba mdah hŏng gưl bruă nah dlông čiăng mâo dŭm hdră êlan djŏ guôp, đru kơ mnuih ƀuôn sang bi hơĭt klei hdĭp.

Truh kơ knhal jih thŭn 2022 mrâo êgao, hŏng tur knơ̆ng mơ̆ng hdră ala čar kñăm mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng, mnuih ƀuôn sang ti alŭ Giàng Pằng dưi đru brei brŏng êa êa, kdrăp yua bruă lŏ hma čiăng đru hlăm klei mă bruă. Ayŏng Giàng A Trư, mnuih ƀuôn sang alŭ Giàng Pằng, să Sùng Đô hơ̆k mơak brei thâo.

Ară anei mâo brŏng êa djăp yua kơ gŏ sang leh, amâo lŏ kƀah êa msĕ hŏng êlâo dih ôh. Êlâo dih ka mâo brŏng mgơ̆ng êa kreh amâo mâo êa yua, gŏ sang kreh nao mă êa hnơ̆ng hnoh.

Giàng A Lứ, k’iăng khua bruă sang čư êa să Sùng Đô, kdriêk Văn Chấn brei thâo:

Dŭm hdră ala čar kñăm jing tŭ dưn êdi, êngao kơ brŏng êa lŏ đru mkăp brei kdrăp yua mă bruă, mđĭng tal êlâo kơ dŭm gŏ sang ƀun ƀin, hlăm klei ngă bruă ăt mâo klei găl hĭn.

Hâo hưn, mtrŭt mjhar mnuih ƀuôn sang krĭng čư̆ čhiăng amâo lŏ bi dôk ung mô̆ mơ̆ng mda leh anăn dôk anak amiêt awa jing sa hlăm dŭm mta phŭn mâo bruă sang čư êa alŭ wăl čar Yên Bái uêñ mĭn êdi. Aduôn Sùng Thị Xía, k’iăng khua bruă sang čư êa să Suối Bu, kdriêk Văn Chấn, čar Yên Bái brei thâo, anei jing bruă klam dleh kyua klei thâo săng mơ̆ng mnuih ƀuôn sang kơ klei bhiăn ala čar ka ênŭm ôh:

Tơdah knŏng hâo hưn hŏng ap phích, pano yuôl ƀơ êngao jing dleh dlan êdi, kyuanăn êjai mâo dŭm hdră êlan hâo hưn, hmei mâo mnơ̆ng bi klă čiăng hâo hưn. Êjai hâo hưn, tơdah yua klei yuăn diñu kăn săng lei, kyuanăn srăng hâo hưn boh klei blŭ djuê ana.

Amai Lầu Thị Mỷ, ti alŭ Bu Cao, să Suối Bu brei thâo, adei mniê ñu thŭn anei mrâo 14 thŭn. Klei hdĭp gŏ sang dleh dlan, ama luč hnưm, amĭ ruă duam, ăt msĕ hŏng hđeh mniê mrâo prŏng djuê ana Mông mkăn, ñu mâo klei mĭn dôk ung hnưm. Dưi thâo boh sĭt boh gŏ sang, phung hưn mdah, hâo hưn mơ̆ng să Suối Bu mâo mtam ƀô̆ mta čiăng hlăk mblang, đrŭ kčĕ:

Leh hmư̆ phung knuă druh hriê ti sang hâo hưn kơ boh jhat mơ̆ng klei dôk ung mô̆ mơ̆ng mda, mâo đa đa truh đŭ hŏng prăk, gŏ sang ăt nao mđĭ ai adei mniê wĭt nao sang hră, ƀuăn amâo mâo brei ñu dôk ung êlâo kơ 18 thŭn.

Hluê ngă hdră ala čar kñăm mđĭ kyar bruă duh mkra ala ƀuôn krĭng mnuih djuê biă leh anăn krĭng čư̆ čhiăng wưng thŭn 2021 – 2025, čar Yên Bái ară anei mâo 10 hdră mkăp, 14 hdră điêt leh anăn 36 mta phŭn dưi hluê ngă hŏng kluôm ênoh prăk giăm 1.200 êklai prăk. Êngao kơ duh bi liê kơ bruă mkŏ mkra, dŭm hdră anei lŏ đru mkăp brei kdrăp yua bruă lŏ hma, ana mjeh, mtô brei klei mă bruă, mgaih msir bruă mă, đru mtrŭt mđĭ klei đĭ kyar bruă duh mkra ala ƀuôn, bi hrŏ ƀun hmar leh anăn kjăp kơ krĭng mnuih ƀuôn sang jing mnuih djuê ƀiă. Amai Mùa Thị Máy, ti alŭ Háng Sung, să Mô Dề, kdriêk Mù Cang Chải brei thâo: Dŭm hdră dôk hluê ngă amâodjŏ knơ̆ng bi mlih klei mĭn bruă ngă, mđĭ kyar klei hdĭp mda gŏ sang, ƀiădah lŏ bi mlih klei mĭn, klei mă bruă mơ̆ng mnuih ƀuôn sang krĭng čư̆ čhiăng:

Mnuih ƀuôn sang, boh nik jing phung amai adei mniê hlăm alŭ rông mnơ̆ng mkŏ mjing hnư̆ hrui wĭt kơ gŏ sang, đru bi lăm lui klei ư̆ êpa, bi hrŏ ƀun.

Đỗ Quang Vịnh, K’iăng khua êpul bruă djuê ana čar Yên Bái brei thâo: Hlăm wưng êgao, êpul ăt bi mguôp hŏng dŭm kdriêk, wăl krah hlăm čar mkŏ mjing dŭm adŭ mtô bi hriăm “mđĭ ai dưi êpul êya yang ƀuôn leh anăn knuă druh hluê ngă hdră ti dŭm gưl hlăm hdră ala čar kñăm mđĭ kyar bruă duh mkra ala ƀuôn krĭng mnuih djuê biă leh anăn krĭng čư̆ čhiăng” kơ khua bruă Đảng nah gŭ, phung khua alŭ, ƀuôn, dŭm êpul hgŭm leh anăn êpul êya yang ƀuôn, čiăng kơ phung knuă druh nah gŭ leh anăn mnuih ƀuôn sang srăng, hluê ngă leh anăn mâo klei tu dư̆n dŭm hdră êlan:

Êpul bi mguôp hŏng dŭm dhar bruă iêo jak dŭm ai dưi, pluă mbĭt dŭm hdră kñăm čiăng ñĕ kơ klei lăp wĭt lăp nao hlăm klei ngă bruă. Bi hŏng nah gŭ, boh nik jing dŭm anôk bruă klă anăp dŭm hdră êlan srăng hluê ngă klă mngač, djŏ pô, djŏ alŭ wăl čiăng kơ dŭm hdră êlan truh hŏng mnuih ƀuôn sang.

Ba hdră êlan hlăm klei hdĭp, mđĭ klei thâo săng mnuih ƀuôn sang, mkŏ mjing klei sa ai hlăm yang ƀuôn, boh nik jing êpul êya mnuih djuê ƀiă, čar Yên Bái dôk gĭr bi leh mta knăm mđĭ kyar kjăp, “mtah, bi kna, knhuah gru leh anăn yâo mơak”.