Điệu Ŭt – mnuih djuê ana S’Tiêng, dôk ti ƀuôn Mười Mẫu, să knông lăn Phước Thiện, kdriêk Bu Dôp lač, gŏ sang ñu nao hdĭp ti ƀuôn Mười Mẫu giăm 10 thŭn hŏng anei leh, mâo knŭk kna mbha brei lăn pla mjing, lăn mdơ̆ng sang snăn jăk snăk. Thŭn 2017, gŏ sang ñu, lehanăn phung ƀuôn sang hlăm ƀuôn anei lŏ mâo klei mơak hĭn, leh pui kmlă knŭk kna mâo dhiang ba truh hlăm ƀuôn, grăp boh sang mâo pui kmlă mtrang mngač, anei yơh jing klei phung ƀuôn sang dôk hmăng hmưi mơ̆ng sui leh.

Čuê dliê mrô 67 dôk hlăm krĭng ƀuôn Mười Mẫu, să Phước Thiện, kdriêk Budôp mâo truh 200 gŏ sang, hŏng đŭm êtuh čô mnuih, truh 95% mnuih hdĭp mda kơ anei jing mnuih djuê ana Stiêng. Êlâo dih, alŭ wăl anei jing anôk dleh dlan knap mñai êdi, phung ƀuôn sang kƀah klei thâo săng, êlan klông dleh dlan, ênoh gŏ sang mâo sang kjăp lehanăn pui kmlă yua knŏng yap mă hŏng kngan, phung hđeh amâo mâo nao sang hră mơar ôh, jih thŭn êngŭn mlan truăn dôk nanao hlăm klei kplŭt aguah kƀah tlam. Yap mơ̆ng leh mâo pui kmlă mâo dhiang ba, snăn klei hdĭp mda phung ƀuôn sang kơ anei mâo klei bi mlih. Phung ƀuôn sang lui yơh môtơr bi êran pui kmlă pioh krih êa kơ mnơ̆ng pla, mâo leh pui kmlă pom êa snăn ênoh bi liê kăn yuôm rei, jing găl guôp hlăm klei duh ƀơ̆ng. Mbĭt hŏng anăn, phung hđeh mâo pui mtrang mngač pioh hriăm hră mơar jăk hĭn. Amâo mâo djŏ knŏng yua pui kmlă pioh mtrang mngač đuič ôh, lu gŏ sang phung ƀuôn sang dơ̆ng blei mtrăp tivi, hip êăt, dhiăr kpưh, gŏ êsei hŏng pui kmlă... Snăn ƀuh klei hdĭp mda dơ̆ng đuĕ nao hlăm klei bi mlih klă mngač. Điểu Thâm, sa čô mnuih hdĭp hlăm čuê dliê mrô 67 brei thâo, phung ƀuôn sang kơ anei hdĭp lu jing djuê ana Stiêng; Mnông; Mă lehanăn Khmer. Mơ̆ng leh mâo pui kmlă knŭk kna, lu gŏ sang kreh kruiñ duh ƀơ̆ng hĭn, klei hdĭp mda mâo klei bi mlih pral, Điểu Thâm hŏng klei mơak yăl dliê:

“Knŭk kna duh msĕ snăn leh, lehanăn đru kơ phung ƀuôn sang mâo bruă knuă, tơl dưi tloh mdơ̆ng sang mrâo, mkra wĭt pưk sang, blei mprăp mnơ̆ng mnuă yua hlăm sang, msĕ si tivi, hip êăt, masin boh mnơ̆ng. Ară anei klei hdĭp mdul hĭn leh, bi tloh blei mnơ̆ng mnuă yua hlăm sang djăp ênŭm”.

Mơ̆ng krah să Phước Thiện nao truh kơ alŭ wăl čuê dliê mrô 67 mâo leh êlan dơ̆ng dap phiăr, ƀuh lu êpul bê, êmô dôk bi ƀơ̆ng rơ̆k hlăm gŭ êyui kñul, đang ksu mrâo pla, mâo leh ênŭm pui kmlă, snăn jih jang mnuih mơak mñai hlăm klei hdĭp mda. Điểu Phúc, sa čô mnuih hdĭp hlăm alŭ wăl čuê dliê mrô 67 mơh: Ung mô̆ hmei hdĭp kơ anei mâo leh 11 thŭn, êlâo dih dôk hlăm klei dleh dlan knap mñai snăk, gŏ sang mâo 4 čô mnuih, ƀiădah amâo mâo djăp êsei huă djam ƀơ̆ng ôh, huă aguah duah aguah, huă tlam duah tlam, hdĭp kơ anei mâo 10 gŏ sang snăn 9 gŏ sang leh dôk hlăm klei knap mñai, dŭm gŏ sang mkăn ăt kăn thâo mâo rei. Mơ̆ng leh mâo knŭk kna duh bi liê, dhiang ba pui kmlă truh, lehanăn hlei sang ka mâo êmô snăn mbha êmô, hlei sang ka mâo bê mbha bê, hlei gŏ sang ka dưi mdơ̆ng ôh sang hơĭt, snăn bi đru rŭ mdơ̆ng brei sang, snăn ară anei jih jang mnuih knŏng gĭr hlăm klei duh ƀơ̆ng yơh čiăng bi mâo djăp êsei huă, đăo knang kơ klei Đảng, knŭk kna đru leh.

Khua mduôm Điểu Krĕ, sa hlăm phung mâo k’hưm ti alŭ wăl yăl dliê, mâo mbha leh lăn hlue hdră 134 mơ̆ng thŭn 2005, truh kơ thŭn 2017, čuê dliê mrô 67 mâo knŭk kna duh bi liê pui kmlă, êlan klông, sang hră mơar, sang êa drao gŭn. Hlăm dŭm thŭn giăm anei, kyua mâo hdră mơ̆ng ala čar kñăm mkŏ mkra krĭng ƀuôn sang mrâo, lehanăn bi hrŏ ƀun, phung ƀuôn sang lŏ dơ̆ng mâo klei knŭk kna mkăp sang dôk, kdrăp mă bruă. Hŏng ai tiê thâo gĭr čiăng kpưn đĭ, phung ƀuôn sang jhŏng ba yua klei kreh knhâo hlăm bruă knuă. Truh kơ ară anei jih jang mnuih hlăm ƀuôn Mười Mẫu knŏng adôk mă 5 gŏ sang knap mñai, hrŏ leh êbeh 90%, mkă hŏng dŭm hrue hlăk alŭ wăl čuê dliê mrô 67 dơ̆ng ngă bruă. Mnuih ƀuôn sang kơ anei mâo klei mơak snăk.

Dơ̆ng mơ̆ng klei amâo mâo pui kmlă, amâo mâo êlan klông, amâo mâo sang hră mơar, amâo mâo êa jua yua, hlăm alŭ wăl čuê dliê mrô 67 êlâo dih, ară anei jing leh anôk jăk mâo djăp ênŭm pui kmlă, êlan klông, sang hră mơar, sang êa drao gŭn, mâo lăn ala, lehanăn êa doh yua. Klei hdĭp hlăk dơ̆ng đĭ hriê kơ prŏng, mâo klei bi mlih hlăm djăp mta. Klei anei dưi mâo kbiă hriê mơ̆ng klei Đảng, knŭk kna, bruă sang čư̆ êa alŭ wăl duh mĭn lehanăn klei phung ƀuôn sang kpưn đĭ čiăng tlaih mơ̆ng klei dleh dlan./.