Dŭm klei hlăp mgưt, klei bi hmô kơ dŭm boh klei hlăm êlan klông, dŭm klei blŭ hlăp amâodah dŭm klei êmuh pŏk, hlăm anăn mâo lu klei hriăm klă klơ̆ng kơ bruă răng mgang klei êđăp ênang hlăm êlan klông dưi mtô ênưih thâo săng, ênưih hdơr, ngă kơ ai êwa hlăm dŭm mmông hâo hưn klei čih kơ bruă răng mgang klei êđăp ênang hlăm êlan klông jing mơak leh anăn jăk hĭn.

Klă klơ̆ng ti sang hră gưl 2 Độc Lập, ƀuôn hgŭm Trung Thành, Êpul bruă hđeh êdam êra ƀuôn prŏng Thái Nguyên bi mguôp hŏng kahan ksiêm ƀuôn prŏng Thái Nguyên, knơ̆ng bruă duh mkra mnia mblei Thái Nguyên mkŏ mjing klei hâo hưn kơ bruă răng mgang klei êđăp êang hlăm êlan klông leh anăn mtô klei mgăt êdeh êđăp ênang kơ giăm 1.200 čô hđeh sang hră hlăm sang hră. Amâodah msĕ si gưl hâo hưn kơ bruă răng mgang klei êđăp ênang hlăm êlan klông kơ êbeh 1.300 čô knuă druh, phung nai mtô, hđeh sang hră ti sang hră gưl 3 Điềm Thụy, kdriêk Phú Bình, mơ̆ng adŭ bruă kahan ksiêm êlan klông, kahan ksiêm čar bi mguôp hŏng Êpul kriê dlăng răng mgang klei êđăp ênang hlăm êlan klông čar leh anăn bruă hđeh êdam êra čar Thái Nguyên mkŏ mjing. Êjai anăn, giăm 800 čô knuă druh, phung nai mtô leh anăn hđeh sang hră ti sang hră gưl 3 Trần Quốc Tuấn (kdriêk Đồng Hỷ) ăt nao hlăm mmông ksiêm hriăm kơ klei bhiăn ala čar kơ bruă răng mgang klei êđăp ênang hlăm êlan klông hŏng klei đru mơ̆ng kahan ksiêm kdriêk Đồng Hỷ. Sang hră gưl 3 Lưu Nhân Chú (kdriêk Đại Từ), sang hră bi mguôp hŏng kahan ksiêm kdriêk Đại Từ mkŏ mjing knăm bi klă hdră bi mguôp kơ bruă răng klei êđăp ênang hlăm êlan klông, klei êđăp ênang hlăm sang hră mơar. Nao hlăm knăm bi klă hdră bi mguôp lŏ mâo pô bi ala khua gĭt gai 8 să jing alŭ wăl mâo hđeh sang hră dôk hluê hriăm ti sang hră.

Hŏng klei mbruă, klei thâo pluă mbĭt dŭm mta phŭn klei hâo hưn hŏng ruap bi hmô, hră pŏk, boh nik jing klei rang mdah, dŭm klei hlăp mgưt, mmông bi tuôm dưi mâo lu klei uêñ mĭn, klei nao hgŭm hur har mơ̆ng hđeh sang hră hlăm sang hră. Diñu mơak sơnăk kyua mâo mmông bi tuôm, wĭt lač dŭm klei êmuh djŏ tuôm hŏng dŭm mta boh klei hlăm êlan klông leh anăn dưi mâo klei mtô găn êrô êđăp ênang hlăm êlan klông, yua đuôn mgang akŏ djŏ hdră…

Adei Đỗ Ngọc Ánh, adŭ 11A1, sang hră gưl tlâo Trần Quốc Tuấn brei thâo:

Hlăm adŭ hriăm, hmei ăt dưi ksiêm hriăm kơ bruă răng mgang klei êđăp ênang hlăm êlan klông, ƀiădah dŭm klei hriăm anăn msĕ dleh thâo săng. Mmông bi tuôm kơ bruă ksiêm hrăm klei bhiăn ala čar kơ bruă răng mgang klei êđăp ênang hlăm êlan klông anei hmei ƀuh jăk êdi, mâo klei mdah, dŭm klei yăl dliê hlăp ƀiădah mâo boh tŭ yuôm bhăn, mơ̆ng anăn phung hmei mâo lu klei hriăm êjai nao hlăm êlan klông.

Leh anăn adei Đỗ Như Ngọc, adŭ hriăm klei Angle 12A1, sang hră gưl 3 Chuyên Thái Nguyên brei thâo:

Hŏng klei blŭ, ăt msĕ hŏng mta phŭn hlăm mmông bi tuôm ênưih thâo săng, mđĭ ai pô thâo săng klă kơ klei bhiăn hlăm êlan klông, leh anăn bi êdah klei mpŭ hŏng bruă hluê gưt djŏ, mpŭ kơ pô, gŏ sang leh anăn yang ƀuôn.

Hlăm dŭm hdră, hđeh sang hră leh anăn phung knuă druh, nai mtô ti sang hră dưi mđing hmư̆ klei hưn hmar kơ boh sĭt bruă răng mgang klei êđăp ênang yang ƀuôn, klei êđăp ênang hlăm êlan klông ti alŭ wăl čar, ƀuôn prŏng. Kah mbha dŭm mta phŭn hlăm klei bhiăn êlan klông, dŭm klei ngă soh leh anăn phŭn agha ngă truh klei truh jŭ jhat hlăm êlan klông, klei thâo êjai nao hlăm êlan klông, dŭm bruă ngă kreh dhar êjai nao hlăm êlan klông msĕ si: hluê ngă djŏ dŭm mta hlăm klei bhiăn êlan klông, pŏk mdhă hưn bi knăl, pui bi knăl hlăm êlan klông, si ngă srăng ngă tơdah tam mâo klei truh jŭ jhat hlăm êlan klông, klei hrăm kơ klei bhiăn ala čar hlăm bruă răng mgang klei êđăp ênang hlăm êlan klông leh anăn mtô klei mgăt êdeh êđăp ênang…Dŭm sang hră ăt bi klă ƀuăn rơ̆ng hŏng Adŭ bruă kahan ksiêm êlan klông srăng hluê ngă djŏ dŭm mta mtrŭn hlăm klei bhiăn êlan klông. Thiếu tá Nguyễn Nam Hưng, adŭ bruă kahan ksiêm êlan klông, kahan ksiêm čar Thái Nguyên brei thâo:

Hâo hưn hŏng êlan online, hlăm mbah internet, êngao kơnăn hmei lŏ hâo hưn klă anăp, hmei ăt mlih mrâo mta phŭn klei hâo hưn, čiăng kơ ênưih hmư̆, ênưih thâo săng hĭn.

Ƀri wưng anei, Adŭ bruă kahan ksiêm êlan klông mkŏ mjing leh klei rang mdah rup “Klei truh jŭ jhat hlăm êlan klông, ƀuah mkra klei ngă soh”, mbha 1000 pŏk hră hâo hưn kơ bruă răng mgang klei êđăp ênang hlăm êlan klông leh anăn mđup brei 20 boh đuôn mgang akŏ Honda kơ phung hđeh sang hră. Hdră ăt mâo hnư mnơ̆ng kơ phung hđeh sang hră jing “pô bi ala dhar kreh hlăm êlan klông” leh anăn phung hđeh sang hră mâo klei hdĭp dleh dlan.

Anei jing bruă mơ̆ng êpul bruă hđeh êdam êra ƀuôn prŏng Thái Nguyên bi mguôp hŏng dŭm anôk bruă mkŏ mjing jêñ jêñ, hŏng hdră mkŏ mjing lu jơr leh anăn klă klơ̆ng. Hluê anăn, kñăm mtô mjuăt phung hđeh sang hră thâo mgăt êdeh êđăp ênang, đru diñu mđĭ hĭn klei thâo săng, hluê gưt klei bhiăn hlăm êlan klông. Wưng kơ anăp, Bruă hđeh êdam êra ƀuôn prŏng Thái Nguyên lŏ dơ̆ng mkŏ mjing hdră anei ti dŭm sang hră hlăm alŭ wăl ƀuôn prŏng.