Knhal jih thŭn 2020, giăm 50 gŏ sang hlăm alŭ anôk dôk ti Cao Biển, să Phú Thượng, kdriêk Võ Nhai mrâo mâo pui kmlă mơ̆ng knŭk kna. Cao Biển ăt jing anôk knhal tuič hlăm čar dưi mâo ênŭm pui kmlă. Klei anei mâo bi mklă leh klei tŭ jing mơ̆ng bruă mkăp pui kmlă kơ krĭng ƀuôn sang ti čar Thái Nguyên, wưng thŭn 2016 – 2020. Amai Triệu Thị Sinh, dôk ti alŭ Cao Biển, să Phú Thượng, kdriêk Võ Nhai, lač:

“Êlâo dih bi êran mă pô pui kmlă hŏng môtơr điêt yua ai êa, knŏng pioh mtrang mngač, ka dưi ba yua mơh hip bi êăt. Mơ̆ng leh mâo pui kmlă mơ̆ng knŭk kna, snăn yua hơĭt tui si čiăng, mơak êdi tloh blei leh hip bi êăt pioh dưm mnơ̆ng ƀơ̆ng”.

Triệu Phú Tiến, Khua alŭ Cao Biển, să Phú Thượng, kdriêk Võ Nhai, lač:

Mâo Đảng, knuk kna dhiang ba êlan klei pui kmlă truh kơ alŭ Cao Biển hmei bŏ hŏng klei mơak. Anei jing klei hmei hmăng hmưi mơ̆ng sui leh, dŭm pluh thŭn hŏng anei.

Amâo mâo djŏ knŏng mâo pui kmlă, mâo dŭm hdră êlan pioh truăn kơ djuê ana mkăn mâo leh mơh ti čar Thái Nguyên mkŏ mjing lehanăn mâo ngă msĕ si: Bruă đru hră Iot mkhư̆ klei ruă biăm kkuê, klei amâo mâo jăk klei mĭn; hdră mđĭ kyar klei duh mkra, ala ƀuôn krĭng ATK (Alŭ wăl êđăp ênang) lehanăn krĭng mnuih djuê ƀiă dleh dlan êdi; hdră êlan kriê pioh, mđĭ bi lar dhar kreh djăp djuê ana ti čar Thái Nguyên truh thŭn 2020... Lý Văn Mùa, Khua bruă Đảng alŭ Lũng Luông, să Thượng Nung, kdriêk Võ Nhai, lač:

Hŏng dŭm hdră anăn mâo đru leh phung ƀuôn sang tlaih ƀun, mjing djăp klei găl kơ phung ƀuôn sang mđĭ kyar bruă duh mkra, lehanăn mkŏ mjing dŭm knhuah dhar kreh phung ƀuôn sang.

Mrâo anei, mâo klei bi mklă mrô 39 mơ̆ng Knơ̆ng bruă sang čư̆ êa čar Thái Nguyên “Čoh čuăn kơ krĭng mjing knuă druh kơ djăp djuê ana dôk hlăm ênoh hrŏng ruah mŭt mjuăt bi hriăm ti sang hră knŭk kna čiêm rông hđeh mnuih djuê ƀiă hlăm alŭ wăl”, ăt jing sa hdră êlan truăn pioh, dưi ruh mgaih leh klei dleh dlan êjai mta mtrŭn mrâo truh kơ dŭm să, ƀuôn dôk hlăm klei dleh dlan kƀah hĕ. Nguyễn Thái Nam, K’iăng khua Anôk bruă đru čung ba phung ƀuôn sang mơ̆ng čar, Khua kiă kriê Anôk bruă djuê ana čar Thái Nguyên êlâo dih lač:

Klei bi kƀĭn prŏng Đảng čar Thái Nguyên mâo leh ênoh čuăn yuôm bhăn, ktưn bi mâo 8% anak aneh mnuih djuê ƀiă mâo hriăm ti dŭm sang hră knŭk kna čiêm rông. Mơ̆ng klei mklă mtrŭn mrô 39 kơ bruă mjuăt bi hriăm čar Thái Nguyên mâo hrŏng ruah leh djăp ênoh čuăn hđeh nao hriăm.

Tơdah ti thŭn 2016, čar Thái Nguyên mâo mâo truh 48 boh să dôk hlăm klei dleh dlan êdi, snăn truh jih thŭn 2021, knŏng adôk mă mil 14 boh să (hrŏ 70%), hnơ̆ng ênoh gŏ sang ƀun krĭng mnuih djuê ƀiă lehanăn čư̆ čhiăng hrŏ kah knar 3% grăp thŭn. Truh jih thŭn 2021, kluôm čar Thái Nguyên mâo truh 73/100 boh să krĭng mnuih djuê ƀiă, lehanăn čư̆ čhiăng djăp ênoh čuăn krĭng ƀuôn sang mrâo, êbeh 3 blư̆ kah knar hlăm kluôm ala. Dŭm ênoh jăk yâo anei brei ƀuh leh klei tŭ dưn mơ̆ng hdră êlan djuê ana, pioh leh kơ dŭm anôk dleh dlan, klă sĭt mâo ngă hŏng klei jăk lehanăn pral ti Thái Nguyên./.