Hlăm mmông bi tuôm, phung bi ala să Dă Nhim, kdriêk Lạc Dương, čar Lâm Đồng hưn leh hŏng Êpul bi ala bruă kƀĭn ala čar Lâm Đồng kơ dŭm boh klei čiăng kơ kdriêk, čar leh anăn gưl dlông hnưm uêñ mĭn, bi klă leh anăn mgaih msir. Hlăm anăn, mâo boh klei êlan dơ̆ng prŏng mrô 27C jhat rai, bi đuôm kpăk nanao kyua klei klưh hroh, lu kdrêč êlan arưp aram leh anăn luč klei êđăp ênang, mjêč ksiêm dlăng, mkăp brei hră yua lăn kơ mnuih ƀuôn sang, hdră đru kơ phung knuă druh gưl să ƀiă êdi…

Bi ala kơ êpul bi ala bruă kƀĭn ala čar Lâm Đồng, Phan Đình Trạc, Khua êpul kiă kriê bruă knuă gưl dlông čih yap dŭm klei bi êdah mơ̆ng phung bi ala leh anăn srăng kƀĭn mklin, hưn mdah hŏng bruă kƀĭn ala hlăm dŭm klei kƀĭn kơ anăn. Hlăm anăn mñă klă, klei mñă duh bi liê pŏk phai, mđĭ hnơ̆ng êlan dơ̆ng mrô 27C jing klei hưn mdah klă klơ̆ng mơ̆ng phung bi ala leh anăn djŏ guôp hdră mđĭ kyar krĭng Lăn Dăp Kngư mơ̆ng Phŭn bruă kđi čar.

Wưng anei, bi ala kơ Êpul khua kiă kriê bruă knuă gưl dlông, Phan Đình Trạc mđup brei leh 20 hnư mnơ̆ng kơ dŭm gŏ sang ƀun ƀin, gŏ sang knŭk kna dlăng ba ti să Dă Nhim, Nao čuă anôk bruă ktuê dlăng leh anăn gĭt gai thâo mĭn mơ̆ng kdriêk Lạc Dương.