Hlăm dŭm mmông bi tuôm, phung bi ala čar Gia Lai bi êdah klei mơak ti anăp klei tŭ jing mơ̆ng klei kƀĭn tal 4, bruă kƀĭn ala gưl 15. Phung bi ala yap yuôm bhăn bruă klam mơ̆ng Êpul bi ala bruă kƀĭn ala čar Gia Lai mâo leh lu klei blŭ bi mguôp yuôm bhăn hlăm klei tŭ jing mơ̆ng klei kƀĭn.

Phung bi ala ăt hưn kơ lu boh klei dôk dleh kpăk hlăm alŭ wăl, msĕ si uêñ mĭn duh bi liê, mđĭ bruă mkŏ mkra krĭng ƀuôn sang, boh nik jing êlan klông. Klei mngăt êa hlăm phung hđeh đĭ ktang hlăm dŭm thŭn êgao, amâo mâo wăl hlăp lêñ kơ phung hđeh krĭng ƀuôn sang, krĭng mnuih djuê ƀiă. Hlăm mmông bi tuôm, lu phung bi ala ăt akâo kơ dŭm dhar bruă djŏ tuôm mâo dŭm hdră êlan bi hơĭt ênoh hbâo pruê, mnơ̆ng yua kơ bruă lŏ hma čiăng kơ ƀĭng ngă lŏ hma mâo klei hơĭt mă bruă knuă.