Mă hră mkiêt mkriêm mâo ênoh 5 êklăk prăk kyua Bruă êdam êra čar Dak Lak bi hgŭm hŏng phung mâo ai tiê kmah mđup brei, Võ Thị Thuận, kahan ba anăp hđăp ti alŭ Tân Hòa, să Tân Lập, kdriêk Krông Ƀuk mgei ai tiê. Êbeh 70 thŭn, grăp hruê ñu ăt hiu duñ giêt čai, giêt ksu duah ƀơ̆ng. Hlăm boh sang klei khăp ƀĭng kahan, ñu brei thâo:

          Ti să bi mguôp hŏng phung êdam êra ăt ngă sa boh sang klei khăp, grăp čô hrăm mbĭt đru mguôp čiăng dưi ngă sa boh sang hlăk anăn mâo ênoh hlăm brô 80 êklăk prăk. Gưl anei snăn diñu brei sa hră mkiêt mkriêm anei.

Bi hŏng Trần Văn Hùng, kahan hđăp ti alŭ 15, să Tân Hòa, kdriêk Ƀuôn Đon, mơak hĭn jing dŭm hruê phung êdam êra ba anăp hlăm să hriê čhưn amâodah nao đru kih mdoh đang pưk hma. Bi blŭ hrăm hŏng phung êdam êra, ñu lŏ hdơr dŭm thŭn mlan siă suôr hŏng ƀĭng kahan ba anăp bi blah kyua klei êngiê kơ lăn čar. Kyua klei đru mơ̆ng phung êdam êra dŭm gŏ sang msĕ ñu dưi mđĭ ai tiê leh anăn mnơ̆ng dhơ̆ng.

Hmei lu jing ngă pưk hma snăn phung ayŏng adei êdam êra truh hruê nao đru, bi mtă mtăn nao đru 1-2 hruê, grăp hruê ăt êbeh 10 čô êdam êra, đru kơ gŏ sang. Wăt hlăk hmei ruă duam, mâo klei truh amâodah hlăk bi kƀĭn bi hdơr snăn phung êdam êra ăt truh leh anăn mâo dŭm hnư mnơ̆ng mđĭ ai.

Čar Dak Lak ară anei mâo giăm 60 êbâo hră mơar phung knŭk kna dlăng ba, hlăm anăn giăm 45 êbâo hră mơar phung mâo ai hŏng lăn čar, găp djuê phung mâo ai hŏng lăn čar leh anăn êbeh 14 êbâo hră mơar phung mkăn msĕ si phung êdam êra ba anăp. Grăp mlan čar Dak Lak tla prăk đru kơ êbeh 10 êbâo čô, hŏng ênoh prăk êbeh 21 êklai prăk.

Ƀri gưl bi hdỏ 76 thŭn Hruê kahan êka êkeh êngiă asei, čar Dak Lak êmuh hrăm, mđup brei mnơ̆ng kơ phung knŭk kna dlăng ba, phung mâo ai krŭ kdơ̆ng hŏng ênoh êbêh 15 êklai prăk, mkŏ mjing ba 55 čô mâo ai hŏng lăn čar êdah êdi ti čar nai hiu čhưn dlăng ti dŭm čar kwar Krah leh anăn kwar Dưr, ba 240 čô mâo ai hŏng lăn čar nao mdei msăn mdrao mgŭn ti Anôk mdrao mgŭn mdei msăn kơ phung mâo ai hŏng lăn čar kwar Krah.

Bi êdah klei mĭn “Mnăm êa hdơr kơ hnoh”, hlăm wưng êgao, phung mda asei Dak Lak mâo leh lu bruă ngă klă klơ̆ng mđing kơ gŏ sang knŭk kna dlăng ba, kahan êka êkeh, êngiă asei hlăm čar. Anăn jing bruă ngă jăk, đru kơ klei hdĭp mda, mkra mjing, mtrŭt mjhar klei găl mkŏ mjing dŭm êtuh boh sang klei khăp kơ ƀĭng kahan, mđup brei dŭm êbâo hnư mnơ̆ng, hră prăk mkiêt mkriêm kơ dŭm gŏ sang dưi ƀiă klei dleh dlan. Hjăn 6 mlan akŏ thŭn anei, kluôm čar mkŏ mjing giăm 300 bruă ngă hdơr knga tla ai, mnăm êa hdơr kơ hnoh, mbĭt anăn hŏng dŭm bruă ngă wĭt kơ phŭn, mtô bi hriăm knhuah gru krŭ kdơ̆ng kơ phung êdam êra, hđeh điêt.

Boh nik hlăm mlan 7 grăp thŭn, ti dŭm alŭ wăl mâo lu bruă ngă mđing kơ klei “hdơr knga tla ai”, “mnăm êa hdơr kơ hnoh” kyua bruă êdam êra čar pŏk ngă. Amai Phan Thị Trinh, K’iăng Khua bruă êdam êra čar Dak Lak brei thâo:

          Dŭm anôk bruă êdam êra ngă dŭm klei hdơr knga tla ai, mnăm êa hdơr kơ hnoh kñăm bi hriăm kơ phung êdam êra, hđeh điêt kơ knhuah gru krŭ kdơ̆ng ktưn hưn kơ djuê ana, bruă klam mơ̆ng phung mda asei hruê anei. Dŭm anôk bruă êdam êra snăn ăt mkŏ mjing dŭm bruă êmuh hrăm leh anăn mđup brei mnơ̆ng kơ dŭm gŏ sang knŭk kna dlăng ba, phung mâo ai krŭ kdơ̆ng, amĭ Việt Nam jhŏng ktang, mao dŭm bruă mkra mđĭ ti dŭm knưl bi hdơr kơ phung êngiă asei, čuh pui diăn hdơr kơ phung jhŏng ktang êngiă asei hlăm mmăt 26/7 kluôm čar.

Hlue si Knơ̆ng bruă mnuih mă bruă –kahan êka êkeh leh anăn ala ƀuôn čar Dak Lak, hlăm wưng kơ anăp, dhar bruă srăng lŏ dơ̆ng mđĭ ktang hĭn bruă hâo hưn čiăng kơ ênuk mda asei thâo săng kơ knhuah gru krŭ kdơ̆ng mơ̆ng phung jhŏng ktang êngiă asei, klei săn asei prŏng prĭn mơ̆ng ênuk êlâo. Mơ̆ng anăn, mđĭ lar knhuah gru jăk siam djuê ana, ngă jăk hĭn hdră “Hdơr knga tla ai”. Êngao anăn jing hmao pŏk ngă, tŭ dưn dŭm hdră êlan mơ̆ng Knŭk kna, mjing klei găl čiăng kơ phung mâo ai hŏng lăn čar leh anăn gŏ sang mkra mđĭ klei hdĭp, lŏ dơ̆ng bi mklă mđĭ lar knhuah gru krŭ kdơ̆ng djuê ana. Ngă jăk bruă anei jing mđing kơ hdră kñăm kriê dlăng kơ gŏ sang knŭk kna dlăng ba, phung mâo ai krŭ kdơ̆ng mâo hnơ̆ng hdĭp mtăp mđơr amâodah lu hĭn mnuih ƀuôn sang mkăn./.