Amai Y Hương, djuê ana Sêdang ti čar Kon Tum brei thâo, dŭm thŭn giăm anei mâo Êpul hgŭm phung mniê čar Kon Tum mkŏ mjing lu klei bi lông msĕ si: Phung hâo hưn mtô mblang mbruă kơ klei mđĭ ai phung mniê hlăm wưng mrâo krĭng mnuih djuê ƀiă, krĭng klei đăo, êđăp ênang kơ phung mniê leh anăn hđeh mniê… anăn ñu pô leh anăn lu phung mniê thâo săng kơ dŭm bruă djuê ana, klei đăo, klei bhiăn mtăp mđơr êkei mniê, klei bhiăn bi dôk ung mô̆ leh anăn gŏ sang…

“Mơ̆ng lu klei bi lông kâo dưi mprăp lu klei thâo phung mniê, dŭm mta phŭn kơ Hdră kñăm ala čar krĭng mnuih djuê ƀiă krĭng čư̆ čhiăng wưng 2021-2030. Dŭm klei thâo kơ klei đăo. Hdră bruă čung ba mnuih ƀuôn sang mơ̆ng Đảng leh anăn Knŭk kna drei. Dưi mđĭ lar bruă klam phung mniê, jhŏng hĭn hlăm klei blŭ hrăm, mă bruă, hlăm dŭm bruă ala ƀuôn hgŭm hlăm bruă kđi čar.”

Boh nik ti Kon Tum thŭn anei, phung hđeh mnuih djuê ƀiă ăt dưi hgŭm hlăm Hdră bi blŭ hrăm plah wah Êpul hgŭm phung hđeh hŏng Anôk dlăng bruă Êpul gơ̆ng bruă ƀuôn sang čar Kon Tum. Anei jing klei yuôm bhăn čiăng kơ phung hđeh ti čar bi êdah klei čang hmăng čiăng kơ Êpul gơ̆ng bruă ƀuôn sang čar ăt msĕ mơh dŭm gưl bruă sang čư̆ êa bi êdah klei mđing dlăng, kriê dlăng, mđing hmư̆ klei blŭ phung hđeh. Adei Phan Phúc Phú, hđeh sang hră adŭ 8C2, Sang hră gưl 2-gưl 3

Liên Việt Kon Tum, brei thâo:  

“Kâo êmuh leh 3 klei êmuh djŏ tuôm kơ bruă hla pŏk web ala ƀuôn, klei ngă knhông leh anăn klei bi čăm hlăm sang hră leh anăn sang tlô ti sang hră jhat rai leh. Mơ̆ng dŭm klei wĭt mơ̆ng phung neh, phung mneh snăn kâo thâo săng yua internet brei mâo klei bhiăn, klei thâo săng. Bruă ngă knhông amâodah bruă bi čăm biêng snăn kâo thâo dŭm dhar bruă ăt mđing dlăng leh. Mơ̆ng klei bi blŭ hrăm anei kâo ƀuh tŭ dưn snăk.

Hlăm dŭm thŭn êgao, mbĭt hŏng dŭm bruă đru kơ bruă duh ƀơ̆ng čiăng kơ amai adei mniê mđĭ kyar bruă duh mkra, dŭm gưl êpul hgŭm phung mniê ti Dak Lak lŏ gĭr pŏk ngă dŭm bruă ngă iêô mkrum prăk čiăng blei hră ênua mdrao mgŭn mđup brei kơ phung dleh dlan. Bruă ngă anei đru kơ lu amai adei mâo klei găl dưn yua hdră bruă mdrao mgŭn, kriê dlăng klei suaih pral, bi hrŏ klei ktrŏ bruă duh mkra tơdah ruă duam. Msĕ si amai Đặng thị Bình, ti alŭ 1, să Ea Kpam, kdriêk Čư̆ Mgar, leh ƀuh hră ênua mdrao mgŭn mơ̆ng êpul hgŭm phung mniê mđup brei, ƀuh hơĭt ai tiê.

“Klei hdĭp gŏ sang kâo snăn ăt dôk dleh dlan, mâo Êpul hgŭm phung mniê să brei 1 pŏk hră ênua snăn kâo bi mni lač jăk lu, mâo leh hră ênua mdrao mgŭn kâo nao ksiêm mkă dưi ƀiă mơh prăk bi liê snăn kâo hơĭt ai tiê sĭt nao ksiêm mkă, bi hrŏ prăk bi liê sĭt nao ksiêm mkă kơ pô.

 Ti Lai Châu, klei mdê mkăn krĭng mnuih djuê ƀiă lŏ mâo klei bhiăn ƀiădah bruă klam phung mniê hlăm klei hdĭp knŏng jing phung mă bruă, phung kkiêng anak. Kyua mâo klei thâo mtô mblang djŏ guôp, truh ară anei bruă klam phung mniê ti alŭ wăl ăt dưi bi mlih leh anăn mâo klei blŭ klă klơ̆ng hlăm gŏ sang. Amai Ma Thị Chư, ti ƀuôn Phìn Chải, să Giang Ma, kdriêk Tam Đường brei thâo: kyua mâo ung jing knuă druh să leh anăn mâo knuă druh khăng wĭt ti ƀuôn hâo hưn mtô mblang anăn dưi bi mlih leh klei mĭn, hdră ngă, đru leh anăn kah mbha hŏng mô̆ anak lu hĭn:

“Grăp hruê bruă kâo jing ngă pưk, ngă hma, rông ŭn, bip, mnŭ ada, rông kbao leh anăn knă kpiê. Aguah wĭt mă bruă, mô̆ ka hmao knă êsei snăn kâo wĭt êlâo knă yơh, guôn tlâo amĭ anak wĭt leh anăn huă ƀơ̆ng. Knăm năm, knăm kjuh msĕ snăn ung ăt nao đru amĭ ama, đru mô̆ ngă pưk hma, bruă hlăm sang. Ară anei gŏ sang mâo klei hdĭp, prăk hrui wĭt hơĭt kjăp, ung amâo čăm biêng mô̆ leh anăn gŏ sang jăk mơak mơh.

        Hŏng klei ngă bruă jăk mơ̆ng dŭm phŭn, dhar bruă, êpul hgŭm leh anăn dŭm gưl bruă đảng, bruă sang čư̆ êa dŭm alŭ wăl, phung mniê leh anăn hđeh mnuih djuê ƀiă hlăk brư̆ hruê dưi răng mgang leh anăn dŭm klei tŭ dưn djŏ klă. Phung mniê, hđeh mnuih djuê ƀiă dưi nao hriăm hră, mđĭ klei thâo săng, hgŭm hlăm bruă ala ƀuôn, dưi kriê dlăng klei suaih prak, răng mgang klei dưi, tŭ dưn djŏ hdră./.