VOV4.Êđê - Adŭ bruă knŭk kna mrâo ba mdah klei Hưn mthâo hruê 7/11/2021 kơ klei klah čŭn mơ̆ng K’iăng khua knŭk kna Vũ Đức Đam, ti klei bi kƀĭn online hŏng dŭm čar Yŭ kwar krah lehanăn Lăn dap kngư kơ hdră gang mkhư̆ klei ruă Covid 19. Leh hmư̆ klei hưn mdah mơ̆ng alŭ wăl, klei blŭ hrăm mơ̆ng phung khua kiă kriê Phŭn bruă mdrao mgŭn, Phŭn bruă kahan ksiêm, Êpul mă bruă mơ̆ng Knŭk kna lehanăn phung bi ala nao ti anôk bi kƀĭn, K’iăng khua knŭk kna Vũ Đức Đam mtă kơ Phŭn bruă mdrao mgŭn mjêč hluê ngă hdră kah mbha, gĭt gai, mkŏ mjing hdră tlŏ vaccine ti dŭm alŭ wăl hlăm kwar Dhŭng lehanăn Lăn dap kngư, rơ̆ng tlŏ aruăt tal 1 kơ jih jang mnuih mơ̆ng 18 thŭn kơ dlông hlăm wang 5 hruê, lehkơnăn lŏ tlŏ aruăt tal 2 djŏ wưng kčah; êdei anăn tlŏ kơ phung hđeh mơ̆ng 12 – 17 thŭn. Phŭn bruă mdrao mgŭn, Phŭn bruă lĭng kahan mkŏ mjing êpul nao đru kơ hdră tlŏ mgang. Phŭn bruă mdrao mgŭn ktrâo lač klă klơ̆ng, rơ̆ng mâo djăp phŭn mkăp êa drao gŭn kñăm dŏng mdrao kơ mnuih ruă F0, bi hrŏ tuič hnơ̆ng ênoh mnuih ruă đĭ kơ kjham, truh kơ djiê./.

H Nêč pô mblang