VOV4.Êđê- Hruê mbruê, ti kdriêk Čư̆ Mgar, čar Dak Lak mâo sa êpul êya mâo klei ruă tưp Covid-19 hlăm yang ƀuôn. Êpul êya ngă bruă alŭ wăl hmar ngă klei kwang dar gang mkhư̆ klei ruă tưp. Hluê anăn, aguah mbruê, hlăm klei ksiêm mkă kman hrŏng ti san êa drao prŏng Thiện Hạnh, knơ̆ng bruă mdrao mgŭn hmâo ƀuh sa čô mâo kman Sars-CoV-2.

 Kwang dar sang hră leh anăn test pral kơ phung bi tuôm giăm

Anăn jing aduôn L.T.L, dôk ti alŭ Phú Thành, să Ea Drơ̆ng, kdriêk Čư̆ Mgar. Hlăm klei ksiêm duah leh anăn ksiêm mkă kman hmar kơ phung F1, knơ̆ng bruă mdrao lŏ hmao ƀuh 5 čô mkăn mâo kman Sars-CoV-2 jing 4 čô čhĭ mnia ti sang mnia Čuôr Dăng leh anăn 1 čô jing čô ñu. Năng mđing hĭn, čô ñu anei dôk hriăm ti sang hră gưl sa Phan Bội Châu, să Ea Drơ̆ng.

 Hlăm tlam 6-10, dŭm êpul test pral kơ 200 čô mnuih bi tuôm giăm hŏng mnuih ruă

Tlam mmăt mbruê, êpul êya ngă bruă kwang dar leh dŭm anôk anei leh anăn ngă klei ksiêm mkă kman hmar kơ 200 čô tuôm jĕ giăm. Khă adiê dôk hjan prŏng ƀiădah êpul ngă bruă mâo klei bi mguôp kwang dar sang hră gưl sa Phan Bội Châu čiăng gang mkhư̆ klei ruă tưp đĭ lar.

Pô mblang: Y-Ƀel Êban