VOV4.Êđê- Krah yan hla luh jing hruê knăm kơ phŭn hđeh, jing mmông phung hđeh mâo klei mơak, dôk mbĭt hŏng amĭ ama, Aduôn aê, hlăp lêñ, dlăng kơ mlan. Khădah, mâo đa đa dŭm alŭ wăl tar tŏng lăn, thŭn anei phung hđeh drông hruê knăm anei hlăm anôk bi ktlah mbĭt amâodah dôk ngă klei bi kbưi yang ƀuôn mbĭt hŏng gŏ sang čiăng gang mkhư̆ klei ruă tưp Covid-19. Bri knăm krah yan hla luh anei, khua lăn čar Nguyễn Xuân Phúc mâo hră mơĭt kơ phung hđeh, hlăm anăn anăn mâo klei čih sơnei: Awa mgei ai tiê kyua phung hđeh dôk điêt ƀiădah jing leh ling khan điêt jhŏng ktang, hdĭp hjăn hlăm wưng kbưi hŏng amĭ ama, mâo ami ama, mnuih hlăm gŏ sang nao ngă bruă ba anăp bruă gang mkhư̆ klei ruă tưp Covid-19. Awa mâo klei mơak lehanăn pah mni kơ phŭng hđeh thâo găn klei dleh dlan, gưt asăp lehanăn mâo klei tŭ dưn hlăm klei hriăm hră mơar, năng hŏng klei uêñ mĭn, răng kriê mơ̆ng gŏ sang leh anăn yang ƀuôn. Phung amuôn mâo nanao klei khăp kơ ala čar, klei hmăng hmưi, amâo mdei klei hriăm, ngă bruă đru mkŏ mjing ala čar ƀrư̆ hruê ƀrư̆ mdrŏng, ƀrư̆ siam, msĕ hŏng Awa Hồ mâo leh klei đăo knang kơ phung hđeh ala čar Việt Nam.

Pô mblang: Y-Ƀel Êban