VOV4.Êđê - Tlam hruê 28/9, K’iăng khua knŭk kna Vũ Đức Đam, Êpul ngă bruă knhăk mơ̆ng knŭk kna kơ hdră gang mkhư̆, mdrơ̆ng hŏng klei ruă Covid 19 mkŏ mjing leh Klei bi kƀĭn online hŏng 19 čar kwar Dhŭng, dŭm čar krĭng Lăn dap kngư, Dhŭng kwar krah kơ bruă bi hgŭm kjăp kñăm ksiêm dlăng klei ruă tưp.

Ti anôk bi kƀĭn, bi ala ƀuôn prŏng Hồ Chí Minh lehanăn dŭm čar Bình Dương, Đồng Nai, Long An čang hmăng dưi lŏ drông mnuih mă bruă mơ̆ng čar mkăn hruê ngă bruă mbĭt anăn mtă kơ mnuih ngă bruă dôk ti alŭ wăl đăm đuê̆ wĭt kơ ƀuôn sang. D ŭm alŭ wăl anei ƀuăn srăng rơ̆ng kjăp klei êđăp ênang ala ƀuôn, tlŏ vaccine kơ mnuih mă bruă lehanăn pral lŏ krŭ wĭt bruă pla mjing, mjing bruă mă h’ĭt kjăp. Phung khua kiă kriê dŭm čar mñă srăng bi hgŭm kjăp hŏng ƀuôn prŏng Hồ Chí Minh, Bình Dương, Đồng Nai, Long An hlăm hdră gang mkhư̆ klei ruă tưp. Hluê si pô bi ala Phŭn bruă mdrao mgŭn, khădah ƀuôn prŏng Hồ Chí Minh, Bình Dương, Đồng Nai, Long An mâo hnơ̆ng tlŏ vaccine aruăt tal 1 lu ƀiădah mnuih tlŏ leh ăt huĭ srăng tưp djŏ klei ruă, mtưp kơ pô mkăn. Kyua anăn, klei êrô êbat mơ̆ng mnuih ƀuôn sang ti ƀuôn prŏng Hồ Chí Minh, Long An, Bình Dương, Đồng Nai wĭt kơ dŭm alŭ wăl mkăn ăt brei ksiêm dlăng, bi ktlah djŏ si klei kčah mtrŭn./.

H Nêč pô mblang