VOV4.Êđê - Leh kdriêk Dak Rlâp, čar Dak Nông ngă klei bi ktlah yang ƀuôn hluê si Asăp mtrŭn mrô 17 hlăm hrue 7-9 hŏng klei blŭ “ti anôk dôk brei dôk tinăn yơh” čiăng gang mkhư̆ klei ruă tưp, Êpul hgŭm phung mniê kdriêk pŏk ngă gru hmô “shiper 0 prăk” nao brei sang mnia kơ mnuih ƀuôn sang. Hluê anăn, ti 11 să, wăl krah, Êpul hgŭm phung mniê kdriêk mkŏ mjing leh 110 êpul nao sang mnia 0 prăk hŏng giăm 700 čô mnuih hlăm dŭm alŭ, ƀuôn.

Grăp hruê, dŭm êpul anei srăng mă hră čih mnơ̆ng čiăng blei nao blei brei kơ dŭm gŏ êsei. Sĭt jao mnơ̆ng phung ba mnơ̆ng amâo bi tuôm ôh hŏng mnuih ƀuôn sang, ƀiădah dưm ti ƀăng jang čiăng rơ̆ng klei kčah mtrŭn gang mkhư̆ klei ruă tưp. Gru hmô anei srăng mâo Êpul hgŭm phung mniê kdriêk Dak Rlâp mđĭ lar hlăm wưng bi ktlah yang ƀuôn hluê si Asăp mtrŭn mrô 16.

H Zawut pô mblang