VOV4.Êđê - Ti anăp klei kpĭ rơ̆ng klei hdĭp mda kơ dŭm êbâo čô mnuih ƀuôn sang wĭt mơ̆ng dŭm čar nah Dhŭng leh klei ruă Covid-19, kdriêk Krông Ƀuk, čar Dak Lak dôk mkŏ mjing hdră djŏ guôp čiăng msir mgaih bruă mă leh anăn klei duh ƀơ̆ng ară anei hĭn leh anăn mâo dŭm hdră msir sui kñăm đru mjing bruă mă kơ mnuih ƀuôn sang leh wĭt ti alŭ wăl.

Jih wưng bi ktlah leh wĭt kơ ƀuôn sang hŏng êdeh p’phŭt, ayŏng Y-Ngoc Niê, ti ƀuôn Ktơ̆ng Drun, să Čư̆ Nĕ, kdriêk Krông Ƀŭk lŏ duah bruă mă djŏ guôp hŏng pô ti alŭ wăl, ayŏng Y-Ngoc Niê brei thâo, êlâo adih ayŏng mă bruă ti wăl krah Bến Cát, čar Bình Dương. Kyua klei ruă Covid 19 mâo dleh dưi ksiêm dlăng, leh lu mlan dôk “Kpăk đuôm” ti Bình Dương hlăk čar anei ksiêk kjăp hdră msir gang mkhư̆ klei ruă, khădah dưi tlŏ leh 2 aruăt vaccine ƀiădah kyua bruă mă amâo h’ĭt, huĭ srăng tưp djŏ klei ruă, prăk mkiêt mkriêm dơ̆ng jih mơh, ayŏng Y-Ngoc wĭt leh kơ ƀuôn sang lehanăn duah bruă mă giăm sang:“Kâo bi mnĭn tơdah boh klei h’ĭt ƀiă kâo srăng duah bruă mă djŏ guôp hŏng pô. Kyua kâo khăp mgăt êdeh lehanăn ăt mâo hră dưi mgăt êdeh leh mơh kyua anăn hbĭl klei ruă tưp dưi ksiêm dlăng kâo srăng duah bruă mă ti anôk bruă mgăt êdeh êdâo. Bi tal êlâo hĭn, kâo srăng dôk ti sang đru bruă pưk hma, ăt mprăp hlăm yan hrui êmiêt kphê ksu mơh, kyua anăn kâo srăng nao pĕ kphê čiăng mâo hnư hrui wĭt”.

Kyua gŏ sang dleh dlan, kƀah lăn pla mjing kyua anăn sui hŏng anei 2 thŭn, ayŏng Lương Văn Hữu, ti ƀuôn Čư̆ Mtâo, să Êa Sin, kdriêk Krông Ƀŭk nao ti Bình Dương mă bruă. Mơ̆ng knhal jih mlan 5, klei ruă Covid 19 dôk mâo dleh dưi ksiêm dlăng ti dŭm čar kwar Dhŭng, anôk bruă ăt bi hrŏ ênoh mnuih mă bruă, kyua anăn ayŏng wĭt kơ ƀuôn sang. Hlăm wưng dôk guôn duah bruă, ayŏng Hữu bi hgŭm leh hŏng êpul êdam êra ba anăp alŭ wăl đru kơ hdră gang mkhư̆ klei ruă tưp ti alŭ wăl.“Kâo wĭt ƀuh phung ayŏng adei nao đru kơ hdră gang mkhư̆ klei ruă tưp suaĭ lehanăn pap êdi, kâo pô dôk ti sang kăn mâo bruă mă mơh kyua anăn kâo nao hgŭm mbĭt, dưi đru ngă ya bruă bi đru yơh. Kâo čang hmăng klei ruă tưp pral dưi msưh kdŭn čiăng kơ jih jang lŏ wĭt hŏng klei hdĭp msĕ yang đar.

Hluê si Hoàng Kiên Cường, Khua anôk bruă sang čư̆ êa kdriêk Krông Ƀŭk, čar Dak Lak, mơ̆ng mlan 5 truh kơ ară anei, kdriêk tŭ drông leh hlăm brô 6 êbâo čô mnuih wĭt mơ̆ng dŭm čar Bình Dương, Đồng Nai lehanăn ƀuôn prŏng Hồ Chí Minh, păt čiăng jih jing mnuih hlăm gưl thŭn mă bruă s’aĭ. Leh tŭ drông mnuih wĭt kơ ƀuôn sang, kdriêk mkŏ mjing leh hdră ksiêm dlăng klei suaih pral, ba bi ktlah djŏ si klei kčah mtrŭn kñăm rơ̆ng kjăp klei êđăp ênang gang mkhư̆ klei ruă tưp.

Truh kơ ară anei, kluôm kdriêk mâo giăm 19.800 ha kphê dơ̆ng hrui êmiêt boh mnga, hŏng hnơ̆ng mâo hlăm brô 44.200 ton kphê asăr. Hluê anăn, srăng čiăng hlăm brô 800 êbâo ai hrui pĕ, bi knar giăm 27 êbâo čô mnuih mă bruă hlăm wang 30 hruê. Dŭm thŭn êlâo, grăp thŭn kdriêk mâo êbeh 6.600 čô mnuih mă bruă mơ̆ng dŭm čar mkăn hriê hrui pĕ kphê. Thŭn anei, kyua klei ruă Covid 19 dleh dưi ksiêm dlăng kyua anăn ênoh mnuih mă bruă mơ̆ng dŭm čar mkăn srăng kƀah, bi hrô hŏng anăn, kdriêk srăng ba yua mnuih mă bruă wĭt mơ̆ng dŭm čar kwar Dhŭng čiăng rơ̆ng hdră hrui pĕ kphê djŏ wưng, mbĭt anăn ăt đru msir mghaih klei kơ bruă mă lehanăn hnư hrui wĭt kơ mnuih ƀuôn sang. Hoàng Kiên Cường lač:“Tal êlâo hĭn, hŏng yan hrui pĕ kphê kơ anăp, klă klơ̆ng srăng kƀah mnuih mă bruă lehanăn srăng dưi thiăm mbŏ hŏng mnuih mă bruă mrâo wĭt mơ̆ng dŭm čar kwar Dhŭng, anei ăt jing hdră msir mghaih bruă mă tal êlâo hĭn. Bi kơ wung sui leh h’ĭt boh klei lehanăn dưi ksiêm dlăng kjăp klei ruă tưp, brei alŭ wăl mđĭ hdră mjuăt bi hriăm, mtô bruă kñăm msir mghaih bruă mă kơ mnuih ngă bruă, iêu mthưr dŭm anôk bruă duh mkra duh bi liê si srăng ngă čiăng anôk bruă duh mkra ăt đru msir mghaih bruă mă kơ mnuih ngă bruă ti alŭ wăl kdriêk, boh nik mnuih mă bruă mrâo wĭt mơ̆ng dŭm čar kwar Dhŭng”.

Hluê si klei ksiêm yap mơ̆ng Knơ̆ng bruă Mnuih ngă bruă – kahan êka êkeh lehanăn yang ƀuôn čar Dak Lak, mơ̆ng mlan 7/2021 truh kơ ară anei, kluôm čar mâo êbeh 75 êbâo čô mnuih mă bruă wĭt mơ̆ng dŭm čar. Knŏng akŏ mlan 10 truh kơ ară anei, mâo giăm 26 êbâo čô mnuih. Hlăm anăn lu jing mnuih mă bruă ti wăl tuh tia mkra mjing ti Bình Dương, Đồng Nai, ƀuôn prŏng Hồ Chí Minh. Čiăng đru kơ êpul mnuih anei, Knơ̆ng bruă hưn mthâo leh kơ alŭ wăl mâo klei čiăng ba yua mnuih mă bruă čiăng bi hgŭm mkăp mnuih mă bruă tơdah sang maĭ lŏ wĭt ngă bruă msĕ êlâo. Hŏng mnuih mă bruă mâo klei čiăng dôk mă bruă ti alŭ wăl, Knơ̆ng bruă ăt mtă kơ mnuih mă bruă dŭm kdriêk, wăl krah, ƀuôn prŏng čih anăn jih jang mnuih mă bruă čiăng mâo hdră đru djŏ guôp./.