VOV4.Êđê - Aguah hruê 15/10, Khua anôk bruă Duh mkra gưl dlông Trần Tuấn Anh mă leh bruă hŏng Êpul hgŭm bruă mnia mblei Mi - ASEAN (USABC). Ti anôk mă bruă, dua tĭng bi trông leh kơ dŭm klei bhiăn, hdră mtrŭn mđĭ kyar bruă duh mkra – ala ƀuôn mơ̆ng Việt Nam, dŭm klei akâo čiăng, ba mdah hlăm dŭm bruă mâo anôk bruă duh mkra Mi mđing dlăng msĕ si bruă mdrao mgŭn, bruă pui kmlă, bruă lŏ hma, ngăn prăk, bruă duh mkra mrô, bruă kreh knhâo, kdrăp mrâo, hdră đru kơ anôk bruă duh mkra lŏ krŭ wĭt lehanăn mđĭ kyar êdei klei ruă tưp....

Trần Tuấn Anh mtă kơ anôk bruă duh mkra Mi lŏ dơ̆ng pŏk mlar hĭn hdră mnia mblei, duh bi liê ti Việt Nam, bi hgŭm hŏng anôk bruă duh mkra Việt Nam hlăm dŭm bruă mâo ala čar Mi dôk đĭ kyar lehanăn Việt Nam dôk mâo klei čiăng, đru mguôp hlăm hdră lŏ krŭ wĭt bruă duh mkra êdei kơ klei ruă tưp. Êpul mă bruă mơ̆ng Êpul hgŭm bruă duh mkra Mi - ASEAN mñă leh klei ƀuăn srăng hrăm mbĭt lehanăn bi hgŭm kjăp hŏng Đảng, Knŭk kna Việt Nam, đru mtrŭt mđĭ klei bi mjĕ, bi hgŭm hlăm bruă duh mkra – mnia mblei – duh bi liê plah wah Mi – Việt Nam ƀrư̆ hruê ƀrư̆ đĭ kyar./.

H Nêč pô mblang