VOV4.Êđê- Aguah hruê 23/9, ti Anôk bruă kƀĭn ala, Khua anôk bruă kƀĭn ala Vương Đình Huệ gĭt gai leh mmông mă bruă mơ̆ng phung khua kiă kriê Anôk bruă kƀĭn ala hŏng Dhar bruă kriê dlăng hdră duh mkra, hmư̆ klei hưn mdah dŭm mta klei hlăm Hdră čuăl mkă ba yua lăn ala čar wưng thŭn 2021 – 2030, hnơ̆ng trah dlăng truh ti thŭn 2050, Hdră kčah ba yua lăn 5 thŭn (2021 – 2025) gưl ala čar. Blŭ hrăm ti anôk mă bruă, Khua anôk bruă kƀĭn ala Vương Đình Huệ mñă klă, lăn ala jing ngăn dŏ mơ̆ng ala čar kyua anăn bruă kriê dlăng, ba yua lăn amâo djŏ knŏng tĭng kơ wưng ară anei hin ƀiădah brei drei tĭng kơ ênuk gưl êdei mbĭt anăn, lăn ala brei dưi kah mbha djŏ guôp hŏng hnơ̆ng trah dlăng hlăm wưng sui amâo djŏ 5 amâo dah 10 thŭn ƀiădah sui hĭn hlăm hdră mđĭ kyar mơ̆ng lăn čar. Hluê si hdră čuăl mkă ba yua lăn wưng thŭn 2021 – 2030, hnơ̆ng trah dlăng truh ti thŭn 2050 lehanăn Hdră kčah ba yua lăn 5 thŭn 2021-2025 srăng dưi hưn mdah kơ Anôk bruă kƀĭn ala ti klei bi kƀĭn tal 2, bruă kƀĭn ala gưl XV. Tĭng, klei anei srăng mâo Dhar bruă gĭt gai anôk bruă kƀĭn ala brei klei blŭ ti anôk bi kƀĭn tal 4 hlăm mlan 10 thŭn 2021./.

Pô mblang: H’Nêč Êñuôl