VOV4.Êđê- Aguah hruê 30/9, kban Thủ Thiêm 2 klă klơ̆ng dưi bi mkŏ 2 nah hang mơ̆ng ƀuôn prŏng Thủ Đức hŏng alŭ 1, ƀuôn prŏng Hồ Chí Minh. Nao ti knăm anei, mâo Khua hlăm Phŭn bru kđi čar, Khua bruă Đảng ƀuôn prŏng Hồ Chí Minh Nguyễn Văn Nên, Khua anôk bruă sang čư̆ êa ƀuôn prŏng Phan Văn Mãi lehanăn bi ala dŭm knơ̆ng, dhar bruă. Pô duh bi liê ngă mkra hdră anei jing Anôk bruă mguôp hnư duh bi liê Đại Quang Minh, hŏng ênoh duh jih jang giăm 4.260 êklai prăk, prăk duh bi liê hluê hdră bi hgŭm knŭk kna – êngao knŭk kna PPP.

Kban Thủ Thiêm 2 mâo boh dlông êbeh 1,4 km, hlăm anăn kban anei dlông 886 m mâo 6 grông êdeh êran. Kban anei mâo gơ̆ng dră dlông truh 113 m. Kban Thủ Thiêm 2 jing hdră bruă dôk hlăm mta kñăm mdua, đru gang mkhư̆ klei ruă tưp êjai lehanăn mđĭ kyar bruă duh mkra – ala ƀuôn êjai mơ̆ng ƀuôn prŏng. Anei jing sa hlăm ƀiă snăk hdră bruă mâo anôk bruă sang čư̆ êa ƀuôn prŏng tŭ ư brei ngă bruă hlăm wưng dôk bi ktlah yang ƀuôn./.

Pô mblang: H’Nêč Êñuôl