VOV4.Êđê- Ƀri bi hdơr hrue Phung duh mkra Việt Nam hrue (13/10), tlam mbrue (7/10) ti Hà Nội, Khua bruă kƀĭn ala Vương Đình Huệ nao čuă Êpul hgŭm phung duh mkra lehanăn bi tuôm hŏng phung bi ala bruă duh mkra Việt Nam ƀri hrue phung duh mkra Việt Nam. Blŭ hrăm ti anôk bi tuôm anăn, Khua bruă kƀĭn ala Vương Đình Huệ mñă, jih jang hdră êlan kơ ala čar mơ̆ng Bruă kƀĭn ala bi mdưm phung ƀuôn sang, lehanăn phung duh mkra jing bruă tal êlâo. Bi ala kơ phung duh mkra, Êpul hgŭm phung duh mkra bi mni kơ bruă kƀĭn ala, Dhar bruă gĭt gai bruă kƀĭn ala pral mâo leh hdră mtrŭn đru kơ mnuih ngă bruă, lehanăn pô yua mnuih mă bruă mơ̆ng keh prăk ênua amâo mâo bruă knuă mă đĭ truh 38 êbâo êklai prăk. lehanăn akâo ngă lu mta bruă čang hmăng kơ bruă kƀĭn ala lŏ ksiêm wĭt jih jang hdră mtrŭn, hră mtrŭn rơ̆ng čiăng bi djŏ hŏng klei bhiăn, lehanăn mâo ba yua mtam, mtrŭn bi pral jih jang hdră êlan đru klă mngač kơ phung duh mkra êjai dôk tuôm hŏng klei dleh dlan, hmăi amâo mâo jăk mơ̆ng klei ruă tưp, čiăng pral dưi dưn yua jih jang hdră êlan mơ̆ng knŭk kna đru./.

Pô mblang: Y-Khem Niê