VOV4.Êđê- Ti Vienna, ala čar Austria, klei kƀĭn trông phung khua bruă kƀĭn ala tar rŏng lăn tal 5 dưi pŏk kčưm leh hŏng klei nao hgŭm mơ̆ng êbeh 100 êpul dŭm ala čar leh anăn phung ksiêm dlăng mơ̆ng IPU. Êpul bi ala gưl dlông Việt Nam mơ̆ng khua bruă kƀĭn ala Vương Đình Huệ djă akŏ nao hgŭm hlăm klei kƀĭn trông anei. Leh knăm pŏk kčưm klei kƀĭn trông, mâo klei bi trông ti gŭ klei gĭt gai mơ̆ng khua kiă kriê IPU lehanăn khua čih hră IPU. Khua bruă kƀĭn ala Vương Đình Huệ lehanăn phung khua gĭt gai bruă kƀĭn ala dlông rŏng lăn bi trông hŏng akŏ “čiăng dưi mâo klei đĭ kyar kjăp srăng kñăm kơ ya mta bruă, klei hơ̆k mơak trei mđao kơ mnuih ƀuôn sang, rang mgang wăl hdĭp mda amâodah mđĭ kyar bruă duh mkra”. Blŭ hlăm klei kƀĭn trông, khua bruă kƀĭn ala Vương Đình Huệ lač: Tơdah čiăng mđĭ kyar kjăp, čiăng kñăm rang mgang klei suaih pral kơ mnuih ƀuôn sang lehanăn wăl hdĭp mda hĭn kơ bruă kñăm mđĭ kyar bruă duh mkra hŏng djăp ênoh. Bruă anei djŏ hŏng klei kñăm mđĭ kyar kjăp truh kơ thŭn 2030 mơ̆ng êpul hgŭm lu ala čar, anăn ăt jing klei bi knar mơ̆ng 3 bruă kñăm hlăm bruă duh mkra, ala ƀuôn lehanăn wăl hdĭp mda.

Pô mblang: Y-Ƀel Êban