VOV4.Êđê - Tŭ ư asăp jak iêu mơ̆ng Khua bruă kƀĭn ala Phần Lan Anu Vehvilainen, Khua bruă kƀĭn ala Vương Đình Huệ lehanăn Êpul bi ala gưl dlông anôk bruă kƀĭn ala Việt Nam nao čhưn leh ti ala čar Phần Lan mơ̆ng hruê 10-11/9. Aguah hruê 10/9, ti ƀuôn prŏng phŭn Helsinki, Khua bruă kƀĭn ala Phần Lan Anu Vehvilainen gĭt gai leh knăm drông Khua bruă kƀĭn ala Vương Đình Huệ.

Leh knăm anei, Khua bruă kƀĭn ala Vương Đình Huệ lehanăn Khua bruă kƀĭn ala Phần Lan Anu Vehvilainen mbĭt hŏng Êpul bi ala gưl dlông anôk bruă kƀĭn ala dua ala čar hluê ngă leh hdră bi trông. Ti anôk bi trông, dua tĭng mñă klă, klei bi mjĕ hgŭm bruă plah wah dua anôk bruă kƀĭn ala hlăm wưng êgao dưi krơ̆ng kjăp lehanăn ba wĭt klei tŭ jăk siam hluê hŏng hdră bi trông êpul phung khua kiă kriê lehanăn dŭm anôk bruă mơ̆ng bruă kƀĭn ala. Bruă kƀĭn ala dua tĭng ăt mâo klei bi hgŭm mbĭt lehanăn mâo klei blŭ đru mguôp yuôm bhăn hlăm klei bi mjĕ EU – ASEAN ăt msĕ mơh hlăm dŭm klei bhiăn mâo dua ala čar jing ƀĭng hgŭm lehanăn hlăm dŭm bruă mâo klei mĭn msĕ mơ̆nh dua tĭng msĕ si bruă klam mơ̆ng hdră êlan lu tĭng kñăm mtrŭt mđĭ klei êđăp ênang, klei dưi anak mnuih lehanăn hdră mđĭ kyar h’ĭt kjăp./.

H Nêč pô mblang