VOV4.Êđê- Ƀri gưl  bi hdơr Hruê phung duh mkra Việt Nam, mmăt hruê 12/10, Khua bruă kƀĭn ala Vương Đình Huệ bi tuôm hŏng Êpul bruă duh mkra mơ̆ng “ Klei bi kƀĭn phung khua gĭt gai anôk bruă duh mkra Việt Nam leh anăn bi mni kơ dŭm Anôk bruă mnia blei êdah kdlưn”. Čih yap klei blŭ mơ̆ng khua gĭt gai dŭm anôk bruă duh mkra ti anôk bi tuôm, khua gĭt gai bruă kƀĭn ala Vương Đình Huệ brei thâo, anei ăt jing hdră êlan, hdră msir mơ̆ng Đảng, bruă kƀĭn ala leh anăn Knŭk kna hlăm wưng mrâo mđing truh kơ bruă krŭ wĭt, mđĭ kyar hơĭt kjăp.

Hlăm hdră kčah lŏ mkra mjing bruă duh mkra mơ̆ng 5 thŭn kơ anăp ăt jing hdră kčah mphŭn mơ̆ng thŭn 2022, Dhar bruă kƀĭn ala bi trông, bi tŭ ư, lŏ bi mlih bruă duh mkra mguôp hŏng hdră kluôm mdrơ̆ng, krŭ wĭt leh anăn mđĭ kyar bruă duh mkra- ala ƀuôn, mđĭ klei čŏng ngă bruă duh mkra, klei dưi mdrơ̆ng hŏng klei mâo, klei amâo hơĭt bruă duh mkra kluôm nah êngao amâodah dŭm bruă djŏ tuôm kơ klei bi mlih yan adiê amâodah klei ruă tưp.

Pô mblang: H’Zawut Ƀuôn Yă