VOV4.Êđê - Ti ƀuôn prŏng phŭn Brussels, Ala mtao Bỉ, Khua bruă kƀĭn ala Vương Đình Hụê bi tuôm hŏng Khua Êpul hgŭm Ơ Rôp Charles Michel.  Bi mni kơ gưl nao čhưn leh anăn mă bruă ti EU tal anei mơ̆ng êpul bi ala gưl dlông Bruă kƀĭn ala Việt Nam leh sa wưng sui hmaĭ kyua klei ruă tưp, Khua gĭt gai EC lač, klei ruă Covid-19 dleh ktuê dlăng kluôm rŏng lăn hmaĭ leh kơ hnơ̆ng leh anăn boh tŭ mơ̆ng bruă hluê ngă klei kuôl kă EVFTA; mñă klă, anăp truh dua tĭng brei ba yua jih klei găl prŏng prŏn mơ̆ng klei kuôl kă anei ba. Khua gĭt gai Charles Michel lač kơ klei mĭn kơ klei êđăp ênang ti krĭng ksĭ India - Pacfic, klei bhiăn yuôm bhăn mpŭ kơ hdră bhiăn leh anăn bi mklă EU čang hmăng pŏk mlar leh anăn bi êlam hĭn klei bi hgŭm hŏng krĭng wăl Ngŏ Dhŭng Asi, hlăm anăn mâo Việt Nam. Khua bruă kƀĭn ala   Vương Đình Hụê bi mklă, Việt Nam lŏ dơ̆ng bi hgŭm tliêr kjăp hŏng EU leh anăn EP hlăm klei bhiăn bi hgŭm lu tĭng; mprăp mjing anôk mkŏ mđĭ klei bi hgŭm EU-ASEAN bi knar hŏng jar Bi hgŭm ASEAN-EU mrâo bi siñê.

H Zawut pô mblang