VOV4.Êđê - Khua bruă kƀĭn ala Vương Đình Huệ truh leh kơ ala čar Bỉ lehanăn mâo klei blŭ hrăm hŏng khua kiă kriê Nghị Viện Ơrôp Âu (EP) David Sassoli. Khua kiă kriê Nghị Viện Ơrôp Âu (EP) David Sassoli hơ̆k mơak tŭ drông khua bruă kƀĭn ala Vương Đình Huệ lehanăn êpul bi ala gưl dlông mơ̆ng bruă kƀĭn ala Việt Nam čuăn ruah leh Nghị Viện Ơrôp jing anôk nao jưh hlăm klei mă bruă jing khua bruă kƀĭn ala Việt Nam. Hlăm klei blŭ hrăm, 2 tĭng bi trông leh lu boh klei kñăm mđĭ klei bi mguôp 2 bruă kƀĭn ala, đru mtrŭt mđĭ klei mjĕ giăm Việt Nam - EU đĭ ktang hĭn kyua klei jăk kơ jih 2 tĭng. Čiăng mtrŭt mđĭ bruă mnia mblei hŏng klei kluôm ênŭm, khua bruă kƀĭn ala Vương Đình Huệ bi êdah klei hmăng hmưi, EP mâo klei blŭ čiăng kơ Nghị Viện dŭm ala čar ka bi klă EVIPA hnưm bi klă klei kuôl kă yuôm bhăn anei, kñăm mtrŭt mđĭ bi mguôp bruă duh bi liê, dưi djăp klei čiăng lehanăn klei jăk mơ̆ng dŭm knơ̆ng bruă, mbĭt anăn lŏ ngă klei găl čiăng ngă klei kluôl kă EVFTA hŏng hdră mâo klei tŭ dưn hĭn.

Y Bel pô mblang