VOV4.Êđê- Aguah mbruê, Khua bruă kƀĭn ala Vương Đình Huệ gĭt gai leh klei kƀĭn trông ngă hdră êlan ksiêm dlăng mơ̆ng dhar bruă gĭt gai bruă kƀĭn ala thŭn 2022. Klei kƀĭn dưi mkŏ truh kơ 63 anôk bi kƀĭn ti dŭm čar, ƀuôn prŏng hlăm ala čar. Blŭ pŏk klei kƀĭn anăn, Khua bruă kƀĭn ala Vương Đình Huệ brei thâo, dhar bruă gĭt gai bruă kƀĭn ala kñăm mkăp leh lu ai dưi, hruê mmông mprăp kơ bruă ksiêm dlăng.

Hlăm thŭn 2022, bruă kƀĭn ala srăng ngă 4 klei ksiêm dlăng hdră mkăp, hlăm anăn mâo 2 klei ksiêm dlăng gưl dlông mơ̆ng bruă kƀĭn ala, hdră mkăp kơ bruă tui ngă hdră êlan, klei bhiăn ala čar kơ bruă čuăl mkă mâo klei dưi tui ngă, bruă tui ngă klei bhiăn ala čar kơ klei mkiêt mkriêm, gang mkhư̆ klei luič liê ti mang wưng thŭn 2016-2021. Hlăm jih jang 4 klei ksiêm dlăng anăn, dhar bruă gĭt gai bruă kƀĭn ala mâo hdră êlan iêo mthưr dŭm anôk bruă kƀĭn ala, mbĭt anăn jao bruă klam kơ 63 êpul bi ala bruă kƀĭn ala dŭm čar, ƀuôn prŏng gưl dlông leh anăn êpul gơ̆ng bruă ƀuôn sang dŭm čar, ƀuôn prŏng gưl dlông nao hgŭm, iêo mthưr jih ai dưi mơ̆ng dŭm anôk bruă djŏ tuôm, dŭm êpul êya nao hgŭm.

Pô mblang: Y-Ƀel Êban