VOV4.Êđê - Hlăm hruê 9.9 hluê si alŭ wăl, Khua bruă kƀĭn ala Vương Đình Hụê leh anăn Êpul bi ala gưl dlông bruă kƀĭn ala Việt Nam nao hlăm Klei bi kƀĭn anôk bruă duh mkra Việt Nam - Bỉ. Blŭ hrăm hŏng dŭm anôk bruă mnia blei mrô sa mơ̆ng Bỉ, Khua bruă kƀĭn ala Vương Đình Hụê bi mni kơ klei mĭn mbruă mkŏ mjing Klei bi trông, dlăng anei jing klei găl jăk čiăng hrăm mbĭt bi đru kơ hdră êlan duh bi liê mrâo, hdră msir mkra mlih anôk duh bi liê mơ̆ng Việt Nam, ba mdah dŭm hdră kčah kñăm mđĭ klei tŭ dưn bi hgŭm, mđing truh kơ klei tŭ jing mơ̆ng dŭm anôk bruă mnia blei Bỉ sĭt duh bi liê leh anăn mnia blei ti Việt Nam. Hlăm wưng kơ anăp, ba yua dŭm klei găl mrâo êdei klei ruă Covid-19, Khua bruă kƀĭn ala mtă kơ anôk bruă mnia blei leh anăn dŭm Êpul hgŭm mnia blei Bỉ đru ktang phĭt čiăng Bruă kƀĭn ala Bỉ hnưm bi leh dŭm hră mơar mđing truh kơ klei bi mklă Klei kuôl kă răng mgang duh bi liê plah wah Việt Nam leh anăn EU (EVIPA) hlăm wưng hnưm hĭn. Bi mklă pŏk êlan phiơr mkŏ plah wah Bỉ leh anăn Việt Nam čiăng mđĭ dŭm bruă bi hgŭm bruă duh mkra, hiu čhưn ênguê, sang hră, mjĕ êrô yang ƀuôn đru kơ dua ala čar jĕ giăm hĭn leh klei ruă tưp dưi ktuê dlăng.

H Zawut pô mblang