VOV4.Êđê - Tŭ ư asăp jak iêu mơ̆ng Khua bruă kƀĭn ala Phần Lan Anu Vehvilainen, Khua bruă kƀĭn ala Vương Đình Huệ mbĭt hŏng êpul bi ala gưl dlông Anôk bruă kƀĭn ala ala čar drei mphŭn gưl nao čhưn 2 hruê ti Phần Lan, hruê 10-11/9. Gưl nao čhưn klă klơ̆ng mơ̆ng Khua anôk bruă kƀĭn ala Việt Nam mâo mkŏ mjing leh 28 thŭn kñăm mtrŭt mđĭ lehanăn bi êlam hĭn klei bi mjĕ jăk siam lehanăn bi hgŭm hlăm lu mta bruă hŏng Phần Lan, hlăm anăn mâo anôk bruă kƀĭn ala Phần Lan; pŏk dŭm klei čang hmăng hlăm hdră bi hgŭm bruă mrâo hlăm klei bi mjĕ dua nah ăt msĕ mơh bi hgŭm hlăm krĭng lehanăn tar rŏng lăn. Hlăm gưl nao čhưn anei, Khua bruă kƀĭn ala Vương Đình Huệ nao kkuh leh Khua mil čhil Phần Lan, bi tuôm hŏng Khua knŭk kna Phần Lan; bi trông hŏng Khua bruă kƀĭn ala Phần Lan; bi tuôm hŏng phung khua kiă kriê krĭng; bi trông čhai jhưng wĭl hŏng phung khua CEO êpul group prŏng mơ̆ng Phần Lan; nao ti knăm siñê bi mklă klei kuôl kă mơ̆ng dŭm anôk bruă duh mkra Việt Nam - Phần Lan; bi tuôm hŏng Anôk bruă bi ala lehanăn Pô bi ala êpul êya mnuih Việt ti Phần Lan./.

H Nêc pô mblang