VOV4.Êđê- Aguah mbrue (30/9), ti sang anôk Bruă kƀĭn ala, Khua bruă kƀĭn ala Vương Đình Huệ kiă kriê klei bi kƀĭn online hŏng Êpul hgŭm phung duh mkra Gưl dlông, mơ̆ng Êpul Gơ̆ng klei duh mkra mnia mblei Mi – ASEAN. Klei bi trông mâo mkŏ mjing tui si tĭng kơ Êpul Gơ̆ng klei duh mkra mnia mblei Mi – ASEAN bi êdah, mâo mkŏ hŏng online truh hlăm dŭm anôk ngă klei bi kƀĭn online jing: Sang bruă kƀĭn ala Việt Nam, ƀuôn prŏng phŭn Washington ala čar Mi; Singapore; Philippine lehanăn dŭm ala car mkăn dlông rŏng lăn, kñăm bi êdah klei ƀuăn mơ̆ng phung duh mkra êngao knŭk kna Mi hlăm bruă klam jing ƀĭng hgŭm năng đăo knang kơ bruă ngă dŭm bruă tal êlâo, boh nik bi mlih mrô, lehanăn klei mđĭ kyar kjăp ti Việt Nam.

Klei mă bruă anei kñăm mđĭ hĭn klei bi mguôp hlăm bruă duh mkra, mnia mblei, duh bi liê dua nah kñăm mâo klei bi trông klă mngač hĭn mơ̆ng phung duh mkra Mi, hŏng jih jang bruă čiăng duh mkra mnia mblei, tui si klei dưi mơ̆ng anôk bruă kƀĭn ala, mâo klei đru mguôp mơ̆ng Êpul Gơ̆ng phung duh mkra mnia mblei Mi hlăm bruă hlue ngă dŭm hdră êlan tal êlâo mơ̆ng bruă kƀĭn ala Việt Nam, lehanăn tui si klei Việt Nam čiăng hlăm bruă duh mkra mnia mblei, lŏ pŏk mlar hĭn mơ̆ng phung duh mkra Mi ti Việt Nam./.

Pô mblang: Y-Khem Niê