VOV4.Êđê - Aguah 8-10, ti kdriêk Châu Thành, čar Tây Ninh, Nguyễn Trọng Nghĩa, Khua hlăm êpul kiă kriê bruă Đảng, Khua Dhar bruă hâo hưn mtô mblang gưl dlông, êpul bi ala bruă kƀĭn ala čar Tây Ninh mâo leh mmông bi tuôm hŏng phung bi ala kơ mnuih ƀuôn sang ti alŭ wăl êlâo kơ klei bi kƀĭn tal 2, Bruă kƀĭn ala gưl XV. Hlăm anôk bi tuôm, pô bi ala bruă kƀĭn ala Hoàng Thị Thanh Thuý, K’iăng Khua êpul bi ala bruă kƀĭn ala čar Tây Ninh hâo hưn kơ boh klei gang mkhư̆ Covid-19 ti alŭ wăl. Hluê anăn, ti Tây Ninh, klei ruă Covid-19 dưi ktuê dlăng ƀiădah ka hơĭt kjăp ôh, ênoh mnuih ruă hlăm êpul êya ăt adôk mâo; ară anei čar dôk mđĭ ktang bruă tlŏ vaccin, pŏk ngă jăk dŭm hdră êlan đru kơ anôk bruă duh mkra mnia blei krŭ wĭt bruă mkra mjing… Phung bi ala akâo brei mđĭ ktang hdră hâo hưn, čiăng kơ mnuih ƀuôn sang ƀuh klei hmaĭ kjham mơ̆ng klei ruă Covid-19 leh anăn mâo klei thâo săng hĭn. Hlăm bruă đru kơ phung hmaĭ kyua klei ruă Covid-19 snăn brei pŏk mlar hĭn, brei iêu jak ala ƀuôn đru blei vaccin čiăng pral krŭ wĭt bruă mkra mjing…

H Zawut pô mblang