VOV4.Êđê - Aguah mbrue (22/10) ti ƀuôn prŏng Hải Phòng, Bruă Đảng kahan gưl dlông, hlăm Phŭn bruă lĭng kahan mkŏ mjing leh kdrăm k’ah knăm bi hdơr 60 thŭn Hrue pŏk êlan Hồ Chí Minh hlăm êa ksĭ (23/10/1961 – 23/10/2021). Khua gĭt gai Đảng Nguyễn Phú Trọng nao hlăm knăm bi hdơr anei. Hlăk ênuk bi blah Mi, hŏng klei čiăng mjêč dŭ ba phao ktuang kơ kdrăn mblah ti Kwar Dhŭng, hrue 19/5/1959. Knơ̆ng kiă kriê bruă Đảng kahan, lehanăn Phŭn bruă lĭng kahan bi klă klei mkŏ mjing Êpul ngă bruă yuôm bhăn, êdei anei bi anăn jing Êpul 559, mâo bruă pŏk êlan dŭ ba mnơ̆ng, mkŏ mjing klei atăt, lehanăn drông lĭng kahan mơ̆ng kwar Dưr nao kơ Dhŭng, lehanăn mơ̆ng Dhŭng nao kơ Dưr. Leh sa wưng ksiêm duah, lông ngă, lehanăn mâo mprăp djăp ênŭm, hrue 23/10/1961, Phŭn bruă lĭng kahan bi klă bruă mkŏ mjing Êpul 759 dŭ lĭng kahan hlăm êlan êa ksĭ. klei mkŏ mjing Êpul 759 mbĭt hŏng bruă pŏk êlan đru kơ kdrăn mblah ti kwar Dhŭng hlăm êlan êa ksĭ jing leh klei kruak knăl yuôm bhăn dŭ mdiăng phao ktuang kăp đru kơ klei bi blah mâo anăn pia Êlan Hồ Chí Minh hlăm êa ksĭ. Dŭm thŭn mlan leh êgao ƀiădah êlan Hồ Chí Minh hlăm êa ksĭ jing leh sa klei myưng m'ang kơ lĭng kahan Việt Nam jing klei bi knăl guh mngač kơ klei jhŏng ktang hlăm klei krŭ kdơ̆ng, hŏng klei thâo mĭn, ai tiê jhŏng kmlăn, gĭr sua mă klei êngiê kơ djuê ana, mluh lir lăn čar./.

Y Khem pô mblang