VOV4.Êđê - Hrue mbrue (11/9), Khua gĭt gai Đảng Nguyễn Phú Trọng, Khua êpul kiă kriê gưl dlông kơ bruă bi kdơ̆ng hŏng klei ƀơ̆ng ngăn kiă kriê leh klei Phŭn bruă kđi čar bi kƀĭn mă klei blŭ kơ hdră “Mlih mrâo, thiăm mbŏ kơ bruă klam, bruă čuăn, klei dưi mơ̆ng Êpul Khua kiă kriê Gưl dlông kơ bruă kdơ̆ng hŏng klei ƀơ̆ng ngăn” čiăng dưi kiă kriê jih bruă kdơ̆ng hŏng klei ƀơ̆ng ngăn, lehanăn klei ngă amâo mâo djŏ hlăm wưng kơ anăp. Leh hmư̆ pô bi ala mơ̆ng êpul khua kiă kriê bruă knuă gưl dlông Anôk kiă kriê mơ̆ng êpul gĭt gai bi êdah boh phŭn hră mdah mơ̆ng hdră êlan, Phŭn bruă kđi čar trông čhai lehanăn bi tŭ ư hĭn kơ jih bruă mâo leh, Khua gĭt gai Đảng mñă, đơ knua boh phŭn klei kiă kriê mơ̆ng Êpul khua gĭt gai Gưl dlông kdơ̆ng hŏng klei ƀơ̆ng ngăn, klei ngă amâo mâo djŏ, boh nik klei toh hroh hlăm klei mĭn, knhuah hdĭp hlăm phung knuă druh, đảng viên, mnuih ngă bruă, êlâo hĭn jing knuă druh khua kiă kriê, khua gĭt gai dŭm gưl mơ̆ng djăp êpul bruă hlăm bruă kđi čar kluôm ala. Tui si Khua gĭt gai, bruă Phŭn bruă kđi čar bi klă bruă mlih mrâo thiăm mbŏ bruă klam, bruă čuăn, klei dưi mơ̆ng Êpul khua kiă kriê gưl dlông kdơ̆ng hŏng klei ƀơ̆ng ngăn, čiăng mâo mkŏ mjing hŏng klei ktang hĭn, kjăp hĭn, amâo mâo mdei, jih ai tiê, ngă bi mdoh hlăm êpul phung knuă druh, đảng viên djŏ hŏng klei čiăng, lehanăn djŏ hŏng klei phung ƀuôn sang đăo knang kơ klei Đảng kiă kriê./.

Y Khem pô mblang