VOV4.Êđê - Ngă klei bi tuôm hŏng phung bi ala kơ ƀuôn sang êlâo kơ klei bi kƀĭn tal 2 Bruă kƀĭn ala gưl 15, Khua gĭt gai Đảng Nguyễn Phú Trọng mâo leh klei bi tuôm hŏng phung bi ala ti dŭm kdriêk čar Ba Đình; Đống Đa; Hai Bà trưng hlăm ƀuôn prŏng Hà Nội, pioh hưn mthâo kơ hdră bi kƀĭn mđing hmư̆ lehanăn wĭt lač dŭm klei phung ƀuôn sang akâo. Lu phung ƀuôn sang bi êdah klei mơak kơ boh tŭ dưn yuôm bhăn mơ̆ng klei bi kƀĭn Gưl dlông 4, mâo klei sa ai hŏng hdră êlan mơ̆ng Đảng knŭk kna kơ bruă knuă druh mprăp leh hlăm hdră mă bruă mâo bi êdah ti anôk bi ruĕ klei bi kƀĭn, Khua gĭt gai Đảng Nguyễn Phú Trọng lač snăn.

Lač kơ bruă gang mkhư̆ klei ruă tưp Khua gĭt gai Đảng bi êdah anei jing klei hmăi amâo mâo jăk prŏng mbĭt hŏng tar rŏng lăn. Snăn truh kơ ară anei jih jang bruă hlăm ala čar anăp dơ̆ng lŏ wĭt msĕ si aguah tlam, mđrĭng hŏng bruă dôk mdrơ̆ng ktang hŏng klei ruă tưp mơh. Khua gĭt gai Đảng čang hmăng hlăm wưng kơ anăp, jih jang bruă kđĭ čar lehanăn phung ƀuôn sang lŏ dơ̆ng mâo klei bi mguôp, bi tŭ ư sa ai tiê, gĭr găn bi dưi jih klei dleh dlan, mâo nanao klei răng hŏng klei ruă tưp. Khua gĭt gai Đảng mtă, grăp čô phung bi ala bruă kƀĭn ala bi năng jing pô bi ala ênuah, mă bruă hŏng klei klă, amâo mâo mdei mâo klei thâo gĭr bi leh bruă kčah jao./.

Y Khem pô mblang