VOV4.Êđê - Ti anôk bruă Đảng gưl dlông Khua gĭt gai Đảng Nguyễn Phú Trọng, Khua kiă kriê Đảng mnuih ƀuôn sang Campuchia, Khua knŭk kna Campuchia Hunssen, lehanăn khua gĭt gai Đảng krŭ kdơ̆ng Lao Thoonglun Sisulit mrâo mâo leh klei bi tuôm gưl dlông 3 ala čar.

Ti anôk bi tuôm, Khua gĭt gai 3 Đảng mâo leh klei trông čhai kơ bruă hgŭm hlăm wưng leh êgao, bi trông kơ dŭm bruă amra lŏ hgŭm tinăp, bi tŭ ư kơ klei bi mguôp mâo leh mơ̆ng đưm, hlăm klei hgŭm bruă kjăp 3 đảng, 3 ala čar. Khua gĭt gai 3 ala čar bi tŭ ư hyuă kjăp hĭn klei hgŭm hlăm djăp mta, dưn yua kjăp klei bhiăn mâo ară anei, lehanăn lŏ bi trông nanao, hgŭm bruă hlăm djăp mta wưng kơ anăp, kyua klei tŭ dưn kơ phung ƀuôn sang 3 ala čar, kyua klei êđăp ênang, hơĭt kjăp hgŭm bruă lehanăn mđĭ kyar ti alŭ wăl lehanăn dlông rŏng lăn./.

Y Khem pô mblang