VOV4.Êđê - K’iăng khua knŭk kna Lê Văn Thành mrâo bi mklă Asăp mtrŭn mrô 27 hruê 3/10/2021 mơ̆ng Khua knŭk kna kơ hdră lŏ krŭ wĭt bruă mkra mjing ti dŭm wăl tuh tia mkra mjing hlăm wưng dôk gang mkhư̆ klei ruă Covid 19. Asăp mtrŭn lač klă, klei ruă Covid 19 bluh mâo hmăi leh kjham truh kơ hdră duh mkra, mnia mblei mơ̆ng dŭm anôk bruă, hmăi truh kơ klei suaih pral, klei hdĭp mnuih ƀuôn sang. Bruă Đảng gưl dlông, anôk bruă kƀĭn ala, knŭk kna ba mdah leh lu Hdră mtrŭn, Asăp mtrŭn, Klei klah čŭn gĭt gai hdră gang mkhư̆ klei ruă Covid 19. Hŏng klei ngă bruă kjăp mơ̆ng jih anôk bruă kđi čar, êpul êya anôk bruă duh mkra lehanăn mnuih ƀuôn sang, truh kơ ară anei, klei ruă ƀrư̆ dưi ksiêm dlăng lehanăn msưh kdŭn. Khua knŭk kna mtă kơ Khua phŭn bruă, K’iăng khua phŭn bruă, phung Khua hlăm Knŭk kna, Khua anôk bruă sang čư̆ êa čar, ƀuôn prŏng hlăm gưl dlông, dŭm êpul bruă lehanăn mnuih djŏ tuôm hluê ngă kjăp Asăp mtrŭn anei./.

H Nêč pô mblang