VOV4.Êđê-Hrue mbrue (13/9), Khua knŭk kna Phạm Minh Chính, Khua kiă kriê bruă ala čar mdrơ̆ng hŏng klei ruă tưp Covid 19 kiă kriê leh klei bi kƀĭn online hŏng dŭm să, ƀuôn hgŭm, wăl krah, kdriêk, ƀuôn prŏng dŭm čar Tiền Giang, Kiên Giang kơ bruă mdrơ̆ng hŏng klei ruă tưp Covid 19. Anei jing dua boh čar lŏ mâo anôk ruă mrâo, lehanăn hlăk hlê dleh dưi ksiêm dlăng. Blŭ hrăm ti anôk bi kƀĭn, Khua knŭk kna Phạm Minh Chính lŏ sa blư̆ dơ̆ng bi klă klei djŏ mơ̆ng hdră êlan mă să, ƀuôn hgŭm mjing kđông, phung ƀuôn sang jing lĭng kahan, jing pô phŭn, lehanăn jing phung ngă bruă mdrơ̆ng hŏng klei ruă tưp.

Člăng ba bruă mdrao mgŭn truh hŏng phung ƀuôn sang, bi hrŏ klei ktrŏ kơ dŭm boh sang êa drao nah dlông, pral mâo mdrao mtam mnuih ruă, bi hrŏ ênoh mnuih djiê. Hjăn dua čar Kiên Giang, Tiền Giang klei ruă tưp ăt dôk dleh dưi ksiêm dlăng, lu sa, ƀuôn hgŭm, wăl krah hlăk ka mâo mnuih ruă dơ̆ng jing anôk huĭ hyưt, anăp jing anôk tưp djŏ, lehanăn mâo lu mnuih tưp anei yơh jing klei dôk hyưt rŭng êdi. Khua knŭk kna čang hmăng hmư̆ dua boh čar anei bi êdah kơ bruă kiă kriê bruă gang mkhư̆ klei ruă tưp, hlăm bruă mblang bi nik phŭn agha ba klei ruă tưp, mơ̆ng anăn mâo hdră mkŏ mjing, gang mkhư̆ bi tŭ dưn./.

Pô mblang: Y-Khem Niê