VOV4.Êđê- Êlâo anăn, Khua knŭk kna Phạm Minh Chính bi tuôm leh hŏng phung aê mdrao, phung thơ̆ng kơ bruă mdrao mgŭn Prăng - Việt Nam. Khua knŭk kna Phạm Minh Chính brei thâo, mrâo êgao gưl klei ruă tưp tal 4, hŏng mta mrâo Delta, klei ruă Covid-19 tưp lar pral hlăm kluôm rŏng lăn, hlăm anăn mâo Việt Nam hmaĭ lu mta hlăm klei hdĭp ala ƀuôn. Khădah hŏng klei gĭr, bi hgŭm, sa ai tiê hrăm mbĭt mơ̆ng kluôm ala leh anăn klei đru mơ̆ng ƀĭng găp dlông rŏng lăn hlăm anăn mâo Prăng, klei ruă Covdi-19 dưi ktuê dlăng. Việt Nam hluê ngă hdră mdrơ̆ng êđăp ênang, mbruă, ktuê dlăng tŭ dưn klei ruă tưp, pŏk ƀăng grăp knhuang krŭ wĭt, mđĭ kyar bruă duh mkra ala ƀuôn. Khua knŭk kna čang hmăng phung aê mdrao, phung thơ̆ng kơ bruă Prăng - Việt Nam lŏ dơ̆ng đru Việt Nam amâo djŏ knŏng gang mkhư̆ klei ruă tưp đuič ôh ƀiădah lŏ đru kơ Việt Nam hlăm djăp mta bruă, boh nik bruă mdrao mgŭn, mđĭ kyar bruă êa drao kyua hdră kñăm lŏ dơ̆ng ba klei jăk mơak, trei mđao kơ mnuih ƀuôn sang.

Pô mblang: H’Zawut Ƀuôn Yă