VOV4.Êđê- Tlam mbruê, khua knŭk kna Phạm Minh Chính mâo leh klei bi tuôm hŏng phung bi ala kdlưn hĭn dŭm gưl bruă phung mniê bri wưng bi hdơr 91 thŭn hruê mkŏ mjuing êpul hgŭm bruă phung mniê Việt Nam, hruê phung mniê Việt Nam 20/10. Hlăm klei bi tuôm anăn, 46 čô bi ala jing phung amĭ Việt Nam jhŏng ktang, phung mniê kreh knhâo kdlưn hĭn, phung mniê bruă mnia mblei, êa mdrao, pô thâo mbruă, mnuih mă bruă, êpul răng mgang klei êđăp ênang, phung mniê ngă bruă hŏng tač êngao, phung mniê mâo klei hdĭp dleh dlan, phung mniê hur har hlăm bruă gang mkhư̆ klei ruă tưp hgŭm mbĭt čiăng bi hdơr dŭm klei leh mâo hlăm thŭn êgao. Blŭ hlăm klei bi tuôm anăn, khua knŭk kna Phạm Minh Chính mñă klă, Đảng leh anăn knŭk kna yap yuôm bhăn klei đru mguôp prŏng prĭn mơ̆ng phung mniê hlăm dŭm ênuk. Mnuih ƀuôn sang hdơr knga kyua klei luič liê mơ̆ng phung amĭ Việt Nam jhŏng ktang, phung amĭ kkiêng leh anăn rông ba dŭm gưl phung jhŏng ktang kơ ala čar.

Pô mblang: Y-Ƀel Êban