VOV4.Êđê- Ti ƀuôn prŏng phŭn Paris, ala čar Prăng, anôk bruă êdeh phiơr Bamboo Airways lehanăn êpul group Safran siñê leh Hră m’ar bi hdơr hgŭm bruă mơ̆ng Khua knŭk kna Việt Nam Phạm Minh Chính lehanăn Khua knŭk kna Prăng Jean Castex. Hdră anei dôk hlăm gưl nao čhưn kơ ala čar Prăng mơ̆ng hruê 3 – 5/11 mơ̆ng Khua knŭk kna Phạm Minh Chính. Ti knăm anei, anôk bruă êdeh phiơr Bamboo Airways lehanăn êpul group Safran – êpul group mrô sa tar rŏng lăn kơ kdrăp êdeh phiơr – siñê leh Hră m’ar bi hdơr hgŭm bruă ruah dŭm kdrăp hlăm êdeh phiơr kơ klei kuôl kă blei 50 boh êdeh phiơr A321NEO lehanăn 30 boh êdeh phiơr Boeing 787-9 mơ̆ng Bamboo Airways.

Ênoh prăk kluôm hlăm klei kuôl kă hgŭm bruă đăo tĭng truh 2 êklai Euro. Klă klơ̆ng mkŏ mjing klei bi mjĕ ƀĭng hgŭm phŭn hŏng Việt Nam mơ̆ng thŭn 2013, truh ară anei, Prăng lehanăn Việt Nam mâo leh klei bi mjĕ kjăp, bi hgŭm hrăm mbĭt đĭ kyar hlăm lu mta bruă. Hlăm bruă êlan phiơr sowil, Việt Nam – Prăng mâo klei bi mjĕ jăk siam mơ̆ng đưm. Knơ̆ng bruă êlan phiơr Việt Nam lehanăn Knơ̆ng bruă êlan phiơr sowil Prăng siñê leh klei kuôl kă bi hgŭm hlăm bruă hdră kdrăp./.

                                                    Pô mblang: H’Nêč Êñuôl