VOV4.Êđê- Hruê mbruê, khua knŭk kna Phạm Minh Chính gĭt gai leh klei kƀĭn online mơ̆ng knŭk kna, dŭm phŭn, dhar bruă djŏ tuôm hŏng dŭm čar, ƀuôn prŏng mâo êa ksĭ kơ bruă gang mkhư̆ bruă mă kan hdang soh hŏng hdră bhiăn, amâo hưn mdah lehanăn amâo ngă tui si hdră bhiăn. Hlăm klei kƀĭn, dŭm alŭ wăl mâo êa ksĭ hưn mdah leh hŏng khua knŭk kna bruă kiă kriê hlăm alŭ wăl pô. Mbĭt anăn lŏ mơĭt kơ knŭk kna, khua knŭk kna dŭm klei akâo mơ̆ng pô lehanăn ƀuăn rơ̆ng hŏng khua knŭk kna amâo lŏ brei mâo klei msĕ sơnăn. Bi mklin klei kƀĭn, khua knŭk kna lač klă hdră êlan mđĭ kyar kan hdang Việt Nam, truh thŭn 2023, hnơ̆ng kan hdang mâo 110 êklăk tôn hŏng hnơ̆ng kan hdang ba čhĭ kơ ala tač êngao hlăm brô 14 truh kơ 16 êklai USD. Klei nao hgŭm lehanăn ngă bruă mơ̆ng phung mă kan hdang hlăm dŭm krĭng êa ksĭ dưi mgaih msir leh bruă mă, hdră duh ƀơ̆ng kơ 1 êklăk čô mă kan hdang lehanăn 4 êklăk čô djŏ tuôm, đru mđĭ kyar bruă kan hdang, mđĭ klei hdĭp mnuih ƀuôn sang, mđĭ kyar bruă duh mkra ala ƀuôn, răng mgang ala čar, klei dưi kiă kriê krĭng ksĭ mơ̆ng ala čar.

Pô mblang: Y-Ƀel Êban