VOV4.Êđê - Aguah hruê 16/9, ti anôk bruă knŭk kna, Khua knŭk kna Phạm Minh Chính gĭt gai leh Klei bi kƀĭn mơ̆ng Knŭk kna kơ hdră čih mkra lehanăn bi leh klei bhiăn. Klei bi kƀĭn mâo mkŏ mjing hluê hdră online mơ̆ng anôk bruă knŭk kna hŏng 63 čar, ƀuôn prŏng hlăm kluôm ala.

Blŭ hrăm ti knăm mphŭn pŏk Klei bi kƀĭn, Khua knŭk kna Phạm Minh Chính brei thâo, leh bruă bi leh ênŭm mnuih mă bruă ti anôk bruă knŭk kna wưng thŭn 2021 – 2026, Knŭk kna, Khua knŭk kna gĭt gai leh dŭm anôk bruă, dŭm gưl hgŭm kngan čih mkra lehanăn bi leh klei bhiăn, hlăm anăn jao kơ Khua kiă kriê tŭ đua klam gĭt gai, ksiêm dlăng, mtrŭt hdră čih mkra, bi leh klei bhiăn. Khua knŭk kna mtă, dŭm phŭn, dhar bruă, alŭ wăl pioh hruê mmông lŏ ksiêm dlăng, bi mklă klei gun kpăk, dleh dlan čiăng hưn mdah. Khua knŭk kna lač klă, anei jing bruă yuôm bhăn êdi, brei drei ksiêm dlăng, bi mklă mta kñăm, bruă klam, klei čiăng, bi mklă klei dôk êdu kƀah, tui duah mta phŭn kñăm msir mghaih jih klei anăn./.

H Nêč pô mblang