VOV4.Êđê- Hruê mbruê 13-9, Khua knŭk kna Phạm Minh Chính mă bruă online hŏng 2 čar Tiền Giang leh anăn Kiên Giang kơ hdră gang mkhư̆ klei ruă Covid-19. Klah čŭn klei bi kƀĭn, Khua knŭk kna Phạm Minh Chính mñă klă, klei bi kƀĭn online hŏng dua čar, mkŏ truh kơ să, ƀuôn hgŭm, wăl krah jing tur knơ̆ng čiăng dưi hmư̆ thiăm klei blŭ mguôp mơ̆ng phung thơ̆ng kơ bruă, mâo thiăm klei thâo, mkra mđĭ klei dưi mdrao mgŭn, thâo kơ hdră gang mkhư̆ klei ruă tưp.

Dua čar Kiên Giang, Tiền Giang gĭr, bi ktlah yang ƀuôn 2 mlan hŏng anei, khădah, dŭm hruê kăm êgao, boh klei mâo amâo msĕ si klei čang hmăng ôh. Khua knŭk kna kčah bruă klam leh anăn lač, mâo wăt boh phŭn kơ bruă gĭt gai, mâo mta phŭn kơ klei mkŏ mjing hluê ngă. Mơ̆ng klei bi trông ti gưl čar, să ƀuôn hgŭm snăn ƀuh dŭm bruă anei ăt adôk mâo lu kƀah, ka păn kjăp hdră msir, mkŏ mjing hluê ngă dôk mtŭk mtul, đaŏ knăl boh klei ka kjăp, ka sĭt êdi mkă hŏng klei ruă tưp hlăk mâo. Khua knŭk kna gĭt gai Tiền Giang leh anăn Kiên Giang brei gĭr ktưn hĭn hlăm hdră gang mkhư̆ klei ruă Covid-19, pral mkhư̆ klei tưp lar mơ̆ng klei ruă tưp.

Pô mblang: H’Zawut Ƀuôn Yă