VOV4.Êđê- Tlam hruê 30/9, Khua knŭk kna Phạm Minh Chính mă leh bruă hŏng Anôk kiă kriê bruă Đảng čar Thừa Thiên Huế kơ hdră mđĭ kyar bruă duh mkra – ala ƀuôn 9 mlan thŭn 2021 lehanăn bruă hluê ngă Hdră mtrŭn mơ̆ng Phŭn bruă kđi čar hlăm bruă mkŏ mkra lehanăn mđĭ kyar čar Thừa Thiên Huế truh ti thŭn 2030, klei tă hdră truh ti thŭn 2045. Klah čŭn ti anôk bi kƀĭn, Khua knŭk kna Phạm Minh Chính čih yap klei gĭr mŏng Thừa Thiên Huế hlăm hdră gang mkhư̆ klei ruă Covid 19 lehanăn hdră mđĭ kyar bruă duh mkra – ala ƀuôn hlăm wưng êgao, đru mguôp tŭ dưn, yuôm bhăn hlăm boh tŭ kluôm mơ̆ng ala čar. Lŏ dơ̆ng mtrŭt mđĭ hdră ksiêm dlăng, bi leh klei bhiăn, hdră mtrŭn, ruh mtlaih klei dleh dlan, gun kpăk hlăm bruă pla mjing, mnia mblei. Mtrŭt mđĭ hdră mkŏ dăp bruă duh mkra mguôp hŏng bruă bi mlih gru hmô lehanăn mđĭ kyar hluê hdră ba yua kdrăp mrâo, mđĭ hnơ̆ng tŭ hdră ngă bruă hŏng bruă phŭn jing lŏ mkŏ dăp bruă duh mkra pla mjing čiăng mđĭ boh tŭ yuôm mnơ̆ng dhơ̆ng hlăm ala čar, mđĭ klei bi ktưn hlăm hdră duh mkra mguôp hŏng bruă hluê ngă mđrăm mbĭt, tŭ dưn dŭm hdră êlan phŭn./.

Pô mblang: H’Nêč Êñuôl