VOV4.Êđê - Khua knŭk kna Phạm Minh Chính, khua êpul gĭt gai ala čar bruă gang mkhư̆ klei ruă tưp Covid-19 mâo leh klei mă bruă hŏng êpul gĭt gai 3 čar Phú Thọ, Sóc Trăng, Cà Mau. Klei mă bruă kñăm ksiêm dlăng, mtrŭt mđĭ bruă gang mkhư̆ klei ruă tưp, mbĭt anăn hmư̆ klei blŭ mơ̆ng dŭm alŭ wăl kơ hdră bhiăn êjai “Hdĭp êđăp ênang, mbruă, ksiêm dlăng mâo boh tŭ dưn klei ruă tưp”. Blŭ hlăm klei mă bruă anăn, khua knŭk kna Phạm Minh Chính mtă kơ dŭm čar Phú Thọ, Sóc Trăng, Cà Mau hmar dưi mkhư̆ dŭm anôk mâo klei ruă tưp mrâo, gĭr ngă dŭm hdră êlan gĭt gai mơ̆ng gưl dlông hŏng 3 mta phŭn. Khua knŭk kna mñă klă, êjai ngă hdră bhiăn “Hdĭp êđăp ênang, mbruă, ksiêm dlăng mâo boh tŭ dưn klei ruă tưp” ăt srăng ngă djŏ dŭm klei bhiăn “5 klei mtă, vaccine, mdrao mgŭn, kdrăp mrâo mrang leh anăn mđĭ klei thâo săng kơ mnuih ƀuôn sang”. Khua knŭk kna mtă kơ dŭm alŭ wăl lŏ bi mguôp kjăp, mâo boh tŭ dưn hĭn hlăm bruă drông ba mnuih ƀuôn sang mơ̆ng alŭ wăl anei nao alŭ wăl mkăn hŏng klei êđăp ênang, rơ̆ng dŭm hdră mdrao gŭn leh anăn klei hơĭt kơ mnuih ƀuôn sang.

Y Ƀel pô mblang