VOV4.Êđê - Aguah mbruê, ti Hà Nội, khua knŭk kna Phạm Minh Chính nao hgŭm leh knăm pŏk kčưm thŭn hriăm mrâo wưng thŭn 2021-2022 mơ̆ng anôk bruă mtô mjuăt lĭng kahan. Wưng thŭn hriăm 2021-2022, anôk bruă kñăm leh kơ bruă mđĭ hnơ̆ng tŭ dưn kluôm hlăm bruă mtô mjuăt, bi hriăm, ksiêm duah klei kreh knhâo, mlih mrâo hdră mtô mjuăt djŏ hŏng wưng mtô mjuăt bi hriăm ară anei. Bi mguôp klei hriăm hlăm hră mơar mbĭt hŏng bruă ngă sĭt, ngă djŏ klei bhiăn, hdră bhiăn hlăm bruă tui hriăm, ksiêm dlăng, čih yap boh tŭ dưn, ktang phĭt ngă “3 klei klă” jing gĭr jih ai bi kdơ̆ng hŏng klei ngă amâo jăk, bi tiŏ êran duah klei bi mni hlăm klei mtô mjuăt, klei hriăm leh anăn klei ngă bruă. Khua knŭk kna Phạm Minh Chính mâo klei mtă; wưng thŭn hriăm 2021-2022, anôk bruă mtô mjuăt bi hriăm lĭng kahan čiăng mâo klei čŏng thâo klă leh anăn đăo knăl, dưi ksiêm dlăng jăk klei ruă tưp, mâo klei mlih mrâo kdlưn, bi kluôm klei mtô mjuăt bi hriăm, mđĭ kyar mnuih mă bruă mâo hnơ̆ng tŭ dưn jăk, iêo mthưr leh anăn yua phung thâo mbruă. Mkŏ mjing dŭm hdră êlan mtô mjuăt bi hriăm, jăk găl hŏng djăp klei truh mơ̆ng klei ruă tưp čiăng dưi ngă bi leh hdră mơ̆ng grăp čô leh anăn rơ̆ng hnơ̆ng tŭ dưn hlăm bruă mtô mjuăt, bi hriăm.

Y Ƀel pô mblang