VOV4.Êđê - Aguah 27/19 mkŏ mjing leh klei bi kƀĭn Gưl dlông ASEAN-Nhật Bản tal 24. Khua knŭk kna Phạm Minh Chính ngă khua êpul bi ala Việt Nam nao hlăm klei bi kƀĭn hŏng phung khua gĭt gai dŭm ala čar ASEAN, khua knŭk kna Nhật Bản Kishida Fumio leh anăn Khua gĭt gai ASEAN. Blŭ hrăm hlăm anôk bi kƀĭn, Khua knŭk kna Phạm Minh Chính bi mklă Việt Nam srăng lŏ dơ̆ng đru mguôp jăk, ba klei bi hgŭm dua tĭng êlam hĭn, tŭ dưn leh anăn klă sĭt.

Khua knŭk kna mñă klă dua tĭng brei bi hgŭm tliêr kjăp hlăm klei krŭ wĭt leh anăn hơĭt kjăp dŭm hdră mkăp kyua Covid-19, mjing klei găl leh anăn đru jih hnơ̆ng čiăng dŭm anôk bruă duh mkra, duh bi liê Nhật Bản mđĭ lar hơĭt kjăp mkra mjing, mnia blei ti krĭng wăl leh anăn Việt Nam. Mbĭt anăn, Khua knŭk kna ăt mtă kơ Nhật Bản đru ASEAN lŏ dơ̆ng đru ASEAN kpĭ êwang bi kpleh đĭ kyar, mđĭ kyar mtăp mđơr, kluôm, hơĭt kjăp ti dŭm krĭng kwar amâo đĭ kyar, hlăm anăn mâo krĭng Mê Kông hlăm jar bi hgŭm Mê Kông - Nhật Bản.

H Zawut pô mblang