VOV4.Êđê - Aguah mbruê, khua knŭk kna Phạm Minh Chính ba anăp êpul bi ala gưl dlông Việt Nam nao hgŭm hlăm klei kƀĭn trông gưl dlông ASEAN tal 38 hŏng êlan online tui si klei iêo jăk mơ̆ng mtao Brunei Hasanal Bolkiah, khua gĭt gai ASEAN thŭn 2021. Klei kƀĭn trông anei jing wưng čiăng kơ ala čar Việt Nam lŏ bi klă êlan hŏng klei êngao êngiê, čŏng ngă mă pô, lu hjơr leh anăn lu ala čar, bi mguôp kluôm êlam hŏng tar rŏng lăn. Blŭ hlăm klei kƀĭn trông anăn, khua knŭk kna Phạm Minh Chính lač, mbĭt hŏng dŭm boh tŭ dưn dưi mâo leh, mtrŭt mđĭ klei bi mguôp, mkŏ mjingb êpul êya yang ƀuôn, čiăng lŏ mdưm kơhưm mơ̆ng ASEAN hlăm klei mjĕ giăm bruă duh mkra - kđi čar dôk mâo klei mlih tar rŏng lăn. Êpul êya hlăm ASEAN ăt lŏ bi kjăp bruă klam jing phŭn kơ dŭm klei blŭ hrăm, klei bi mguôp bruă duh mkra lu ala čar, lu gưl hlăm alŭ wăl. Čiăng nao hgŭm hĭn hlăm dŭm klei mkăp brei hlăm alŭ wăl leh anăn tar rŏng lăn, mđĭ klei jăk anôk mnia mblei ASEAN leh anăn mtrŭt mđĭ bruă krŭ wĭt bruă duh mkra leh hgao klei ruă tưp.

Leh nao hlăm klei bi kƀĭn gưl dlông ASEAN 38, Khua knŭk kna Phạm Minh Chính ngă khua Êpul bi ala gưl dlông Việt Nam nao hlăm klei bi kƀĭn gưl dlông ASEAN 39. Blŭ hrăm hlăm klei bi kƀĭn, Khua knŭk kna Phạm Minh Chính bi êdah klei čang hmăng mâo sa anôk êđăp ênang, hơĭt kjăp leh anăn bi hgŭm čiăng kƀĭn gang mkhư̆ klei ruă tưo, krŭ wĭt leh anăn lŏ dơ̆ng mđĭ kyar mdrŏng sah hlăm êpul hgŭm. Khădah, boh sĭt drei ƀuh klei dleh đaŏ knăl, hmaĭ truh kơ klei hơĭt kjăp ti krĭng wăl. Khua knŭk kna Phạm Minh Chính ăt mtă kơ ASEAN brei mâo klei mĭn sa anăn ti anăp dŭm bruă krĭng wăl leh anăn dlông rŏng lăn, bi mni kơ ƀĭng hgŭm, hlăm ai tiê đua klam, mkŏ mjing, mpŭ kơ hdră bhiăn quốc tế, amâo hmaĭ kơ klei êđăp ênang, hơĭt kjăp bi hgŭm leh anăn mđĭ kyar ti krĭng wăl, mpŭ bruă klam mơ̆ng ASEAN leh anăn kčĕ djăp ênŭm hŏng ASEAN hlăm klei bhiăn, klei bi kƀĭn kyau ASEAN mkŏ mjing leh anăn atăt gai, ASEAN ngă bruă klam phŭn.

Y Ƀel pô mblang