VOV4.Êđê - Êlâo anăn, tlam hruê 28/10/2021, Khua knŭk kna Phạm Minh Chính djă akŏ Êpul bi ala Việt Nam nao hlăm hdră online mơ̆ng Klei bi kƀĭn gưl dlông ASEAN – Nga tal 4 ƀri bi hdơr 30 thŭn hruê mkŏ mjing klei bi mjĕ ASEAN – Nga. Phung khua kiă kriê dŭm ala čar ASEAN, Khua mil čhil Nga Vladimir Putin lehanăn Khua hlăm ASEAN nao leh ti Klei bi kƀĭn anei. Phung khua mñă klă klei tŭ yuôm mơ̆ng knăm bi hdơr 30 thŭn ASEAN – Nga, bi mni kơ dŭm klei đĭ kyar hlăm klei bi mjĕ ƀĭng hgŭm phŭn ASEAN – Nga lehanăn bi mklă Hdră kčah ngă bruă kluôm wưng thŭn 2021 – 2025. ASEAN lehanăn Nga mñă klă hdră bi hgŭm kñăm msưh kdŭn klei ruă Covid 19, bi hgŭm gĭr kah mbha vaccine êđăp ênang, tŭ dưn lehanăn mtăp mđơr kơ mnuih ƀuôn sang hlăm krĭng. Dua tĭng tŭ ư mđĭ hĭn hdră bi hgŭm, bi blŭ hrăm, bi trông kơ hdră mdrơ̆ng hŏng klei lông dlăng bruă răng mgang klei êđăp ênang, đru mguôp hlăm klei êđăp ênang, h’ĭt kjăp mơ̆ng krĭng wăl, msĕ si Đru kčĕ gưl dlông kơ bruă răng mgang klei êđăp ênang, bi blŭ hrăm ASEAN – Nga kơ bruă kdrăp hâo hưn ênuk mrâo. Dŭm ala čar bi tŭ ư thŭn 2022 jing Thŭn bi hgŭm bruă kreh knhâo – kdrăp mrâo ASEAN – Nga, ƀuăn srăng bi hgŭm mtrŭt mđĭ bruă mnia mblei, duh bi liê, lŏ krŭ wĭt lehanăn bi h’ĭt bruă mkăp, mđĭ klei bi hgŭm plah wah Êpul bruă Duh mkra Asi – Ơrôp hŏng ASEAN./.

H Nêč pô mblang