VOV4.Êđê -  Ăt hlăm tlam hruê 26/10, Khua knŭk kna Phạm Minh Chính nao lehanăn blŭ hrăm ti Klei bi kƀĭn gưl dlông ASEAN – Trung Quốc tal 24. Blŭ hrăm ti knăm anei, Khua knŭk kna Phạm Minh Chính mñă klă, hŏng ktuê êlan mŏng 30 thŭn klei bi mjĕ, 25 thŭn ƀĭng hgŭm bi blŭ hrăm, 18 thŭn ƀĭng hgŭm phŭn, ASEAN lehanăn Trung Quốc mjing leh tủ knơ̆ng bi hgŭm bruă kluôm dhuôm, lu jơr lehanăn klă sĭt hlăm djăp mta ra bruă. Dưi mâo klei anei kbiă hriê mŏng klei gĭr lehanăn klei ƀuăn rŏng ktang phĭt mŏng dua tĭng čiăng ksŭl mbŭ klei bi mjĕ đăo knang, thâo săng lehanăn mpŭ hdơ̆ng găp, bi hgŭm ba wĭt klei tŭ dưn. Khua knŭk kna bi mni lehanăn čang hmăng Trung Quốc, hŏng klei găl mâo mơ̆ng pô, lŏ dơ̆ng nao hgŭm hlăm krĭng lehanăn tar rŏng lăn hlăm hdră ksiêm dlăng klei ruă tưp, krơ̆ng kjăp wăl anôk êđăp ênang, krŭ wĭt lehanăn đĭ kyar h’ĭt kjăp./.

H Nêč pô mblang