VOV4.Êđê - Hluê si klei hưn mơ̆ng Chile, Khua knŭk kna Phạm Minh Chính mâo leh klei bi trông hluê êlan đĭng blŭ hŏng Khua mil čhil Chile čiăng bi trông kơ klei bi mjĕ Việt Nam – Chile ăt msĕ mơh hdră bi hgŭm plah wah dua ala čar kñăm mdrơ̆ng hŏng klei bi mlih yan adiê, đru mguôp hlăm klei tŭ jing mơ̆ng Klei bi kƀĭn gưl dlông Êpul hgŭm lu ala čar kơ bruă bi mlih yan adiê tal 26 COP 26 anăp truh. Ti anôk bi trông, dua khua kiă kriê bi mni klei đĭ kyar jăk siam hlăm klei bi mjĕ dua nah, boh nik prăk mnia mblei dua nah hlăm 9 mlan akŏ thŭn 2021 mâo 1,47 êklai USD, đĭ 95% mkă hŏng wưng anei thŭn êlâo.

Dua tĭng tŭ ư kơ dŭm hdră msir mđĭ hĭn Klei bi mjĕ ƀĭng hgŭm bruă kluôm dhuôm plah wah dua ala čar hlăm wưng ti anăp. Dua tĭng ƀuăn srăng krơ̆ng kjăp lehanăn sa ai hdơ̆ng găp ti dŭm êpul bruă tar rŏng lăn lehanăn klei bi kƀĭn trông lu tĭng, đru mđĭ hĭn klei bi mjĕ plah wah ASEAN lehanăn Êpul hgŭm Parcifik, đru mguôp hlăm klei êđăp ênang, hgŭm bruă lehanăn đĭ kyar ti dua krĭng wăl./.

H Nêč pô mblang