VOV4.Êđê - Ƀri nao ti anôk bi kƀĭn COP 26, nao čhưn kơ ala čar Angle, Khua knŭk kna Phạm Minh Chính mâo leh klei bi tuôm hŏng khua gĭt gai Êpul hgŭm lu ala čar Antionio Guterres. Ti anôk bi tuôm anei, trông čhai hŏng khua gĭt gai Êpul hgŭm lu ala čar kơ klei hmăi amâo mâo jăk prŏng mơ̆ng klei bi mlih yan adiê hŏng ala čar Việt Nam, Khua knŭk kna mñă sa blư̆ dơ̆ng jih jang klei Việt Nam ƀuăn hlăm hdră mdrơ̆ng hŏng klei bi mlih yan adiê. Antonio Guterres bi myuôm klei Việt Nam bi mguôp hŏng lu ala čar, boh nik hlăm bruă mdrơ̆ng hŏng klei bi mlih yan adiê. Mâo klei srăng đru kơ Việt Nam hlăm bruă mđĭ kyar klei duh mkra mtah doh, mđĭ kyar bruă bi êran pui kmlă hŏng ai angĭn lehanăn pil yang hrue, đru kơ Việt Nam lehanăn dŭm ala čar ktuê hnoh krông Mekong mghaih kmsir klei klưh hang krông, klei trô̆ msĭn, bi mlih hdră pla mjing, ba yua êa hŏng klei kjăp, rơ̆ng bi mâo djăp mnơ̆ng ƀơ̆ng huă./.

Y Khem pô mblang